Ka Meghalaya ASHA Workers’ Union (MAWU ) ha ka 17 tarik ïaiong 2026 ka la pynlong ia ka General Election ban jied biang ia ki nongkitkam ba thymmai hadien ba lah kut ka samoi treikam.
Ia kane ka jingjied ia ki nongkitkam ba thymmai la pynlong ha Madan Student Jaiaw naduh ka 10:00 baje mynstep haduh da pynbna ia ki nongkitkam ba thymmai haduh ka janmiet jong ka 17 tarik ïaiong 2025 .
Ha kane ka sngi da ki hajar ngut ki nongtrei ASHA na kylleng ka jylla ki la iawan ban iashim bynta ban jied ia ki nongialam ba thymmai.
Ha shwa ban pynbna ïa ka result, la pynlong ïa ka jingïalang paidbah ha kaba la ïashim bynta da ki katto katne ki riew pawkhmat, kiba kynthup ïa u Chairman ka KHADC u Bah Strong Pilar Kharjana, u EM Bah Isynei Hinge, u Legal Adviser Bah Nesterjune Marbaniang, ka Adviser Kong Sony Kharjana bad bah Kyrmenlang Uriah Chairman ka Sur U paidbah , nalor kiwei pat.
Hadien ka jingniew vote, kiba pyniaid ia ka elekshon ki la pynbna ba ka Kong Mira June Marsing ka la shah jied biang kum ka President jong ka Meghalaya Asha Worker Union , kaba pyni ia ka jingbteng ka jingshaniah jong ki nongtrei ASHA ha ka jinglong nongialam jong ka bad Ka dei na ka shnong Umpyrdong kaba don ha Ri Bhoi District ,ka Kong Wanshailut Wahlang ka la shah jied biang kum ka Secretary, katba ka Kong Fiona Timung ka la shah jied kum ka Treasurer.
Haba kren sha ki lad pathai khubor ka President ba thymmai ka Union ka la iathuh ba ka thong ba hakhmat jong ka ban trei na ka bynta ka Union ka long haba iadei ban ioh jingiarap na ka Sorkar ban tei ia ka ophiss treikam ka Union bad haba iadei ka jingsiew ba ki Asha ki ioh shisien shibnai ba ka sorkar kan pynkiew.
