Ka Sorkar jylla ha ka 16 tarik ïaiong 2026 ka la mynjur ban ithuh noh ia ka ktien Khasi bad Garo kum ka ktien sorkar ha ka jylla.
Ïa kane ka la pyntip da u Myntri Rangbah ka jylla ha ka jingialang kynhun myntri myntri da kaba mynjur ia ka rai kaba kongsan ban ai kyrdan ia ka ktien Khasi bad Garo, ryngkat bad ka ktien phareng, kaba long ka sienjam kaba kongsan ban kyntiew ia ki ktien tynrai ha ka jylla.
U Myntri Rangbah ka Jylla u Conrad K. Sangma, haba kren ha ki lad pathai khubor hadien ka jingïalang jong ka kynhun myntri u Myntri Rangbah u la pyntip ba ka Sorkar ka la mynjur ia ka Meghalaya Official Languages Ordinance, 2026, katba ka la weng noh ia ka Meghalaya State Language Act kaba kham mynshwa, 2005. Hapoh katei ka aiñ kaba thymmai, mynta yn ithuh noh ia ka Khasi bad Garo kum ki ktien sorkar jong ka jylla, nalor ka ktien phareng.
U Myntri Rangbah ka Jylla u la pynpaw ia ka jingsngewkmen halor katei ka rai, da kaba kdew ba kan plie lad plie lynti thymmai khamtam ia ki samla bad kan pynkhlaiñ ia ka jingpyndonkam ia ki ktien tynrai ha ki kam sorkar.
Nalor kata u la ong ba yn pynkylla ia ki jingdonkam ha ki aiñ kiba iadei, kynthup ia ka aiñ jong ka ïing dorbar thaw aiñ jong ka jylla bad kan ailad ïa ki dkhot jong ka Assembly ban kren da ka ktien Khasi bad Garo ha ki por shong dorbar, lait na ka ktien phareng.
Kane ka sienjam kan plie lad ruh ia ki eksamin iakop ban pynlong ha ki ktien trai ri ha ki por ban wan.
U Myntri Rangbah ka Jylla u la pynshai ba wat la ki don ki jingkylla kiba yn pyntreikam mardor, kiwei pat kin donkam por namar ki jingdonkam ha ka liang ka jingpynbiang kum ka bor briew, ki jingtei, bad ka jingthaw aiñ.
U la ong shuh shuh ba katei ka rai ka ïahap bad ka jingdawa jong ka jylla ban pynrung ïa ka Khasi bad Garo ha ka Khyrnit kaba phra jong ka Riti Synshar, da kaba ban jur ba ka Meghalaya ka dei ban shim ïa ki sienjam kiba shimkhia hapoh ka jylla hi ban kyntiew ïa ki ktien tynrai jong ka.
La khmih lynti ba kane ka ordinance kan kyntiew shibun ia ka jingpynrung ia ka ktien ha ka synshar khadar bad kan pynkhlaiñ ia ka kolshor jong ki paidbah ka Meghalaya.