Mynta ka sngi (1/5/2026) u ma Kyrshan Blah, President ka Meghalaya People United Front (MPUF) u la kren sha ki lad pathai khubor halor ki kam tih dewiong ha East Jaiñtia Hills District.
U Blah u la pynpaw ba naduh ka jingkhang jong ka NGT ha u snem 2014, ki briew ha ka District East Jaintia Hills ki la ïakynduh jingeh shikatdei eh ha kaba ïadei bad ki kam ki jam, ka roi ka par, ka ïoh ka kot, ka jingnang jingstad, bad kiwei kiwei. Ka jingkhang ka la ktah jur ia ki rukom im jong ki nongshong shnong. Ha kine ki bnai ba la dep, katto katne ki kam tih dewiong ki la sdang biang, kaba la ailad ia ki trai dewiong ban ai lad kamai. U la ianujor ia ka jingplie biang ia ka jingtih dewiong kum ka jingai kam sorkar ia ki briew. Ka MPUF ka kyntu ia ka sorkar ban weng noh ia ka jingkhang tih dewiong ba pura lada lah, khnang ba kan ym ialam bakla ia ki samla sha ki kam runar.
U la kyntu ia ki seng sain pyrthei ba kin sangeh noh ban pyndonkam ia ki jingkular tih dewiong tang ban khring ia ki nongthep vote ha ka por elekshon bad u la khot ia ki paidbah ba kin long kiba stad.
U Blah u la khot ia ki nongkhaïi dewiong ban pynlong ia ki jingiakhih pyrshah ia ka sorkar, namar ba tang ki jingialang kin ym ai jingmyntoi. Baroh arngut ki nongmihkhmat na ka district ki la rah ia kane ka mat, kumta ka rai ka shong ha u Myntri Rangbah ka jylla. U la maham ia ka jingkiew jong ka jingtuh jingthiem ha ki por ban wan, khlem da don mano mano ban shim ia ka jingkitkhlieh katba ki briew ki nang duh jingkyrmen bad nang thngan. Bun ki kynthei mynta ki mih na la ïing bad ki khun ban leit wad kam shawei pat tang ban ioh pynkdang ialade. Ka jingplie biang ia ka jingtih dewiong kan pynmih khajna ruh ia ka sorkar. U bah Blah u la ong shuh shuh ba lada ka sorkar ka kwah ban bat ia ka bor ka dei ban ailad mardor ban tih dewiong ha ka District.