U Myntri Rangbah ka jylla u Conrad K. Sangma ha ka 1 tarik Jymmang 2026 u la hiar da lade na kali ha madan Student ban iakren bad ki nonghikai lem bad ki dkhot ka Meghalaya Vocational Teachers Union (MVTU), kiba pynlong ia ka jingiakhih shabar jong ka Student Field da kaba bat ia ki placard.
Ki dkhot ka MVTU ki la kynnoh ba ki la shah iehnoh beiñ naduh u snem 2019 watla ki hikai ia ki klas naduh IX haduh XII ha ki kyrdan Secondary bad Higher Secondary.
U President ka MVTU u Aibansuk Suchiang u la pynpaw ba ki nonghikai ki dang ïai bteng ban ïoh ïa ka tulop kaba duna bha bad kim shym la ïoh kano kano ka jingpynkiew tulop, ka jingpynkylla ïa ka tulop, lane ka polisi treikam ba pura, watla ka jinghikai ka la don naduh u snem 2017.
“Ngi la pynpaw ia kane ka jingdawa naduh u snem 2019 bad ngi la aiti ia ki jingthoh jingkynmaw bunsien sha ki myntri bad sha u Myntri Rangbah ka Jylla, hynrei haduh mynta ym pat shym la leh ei ei kaba thikna”, u la ong.
U la ban jur shuh shuh ba ki nonghikai vocational ki leh ia kajuh ka kam hikai ha ki skul bad kumta dei ban pynrung ia ki ha ka rukom siew tulop ba la pynkylla kum kiwei pat ki nonghikai.
kumta hadien ba iohi ia ka jingiakhih, u Myntri Rangbah u la hiar na kali ban iakren beit bad ki nonghikai , U la pynthikna ba un peit bniah ia ki jingdawa jong ki bad un sa pyrshang ban leh ia kaba donkam.
“Ngan pyrshang katba lah ban iarap bad leh katba lah”, la ong u Myntri Rangbah ka Jylla ha ki nongiakhih.
