ki Nonghikai ka Meghalaya SSA Schools Association Central Body & 4th Teachers Association, ha ka 1 tarik Jymmang 2026 ki la ai khublei ia u Myntri Rangbah ka Jylla, u Conrad K Sangma, kum ka jingithuh ia ka jinglong shngaiñ jong ka sorkar jylla na ka bynta ban wanrah thymmai haba iadei bad ka Structure Pay Frame work (SPF) bad kumjuh haba iadei bad ka jingsiew kaba thymmai ia ki Nonghikai SSA bad kumjuh ia ki 4 teacher Association ha ka jylla.
Ïa kane ka jingialang la pynlong ha madan Student Jaiaw, ha kaba u Myntri Rangbah ka Jylla u Conrad K Sangma, u Symbud Myntri Rangbah u Bah Prestone Tynsong, u Myntri ka tnat Pule Puthi u Lahkmen Rymbui, Myntri ka tnad Tourism, u Timothy D Shira, Myntri ka tnad Arts & Culture u Shanbor Shullai MLA ka Umsning, u Dr C Lyngdoh, u Commissioner & Secretary ka pule puthi u Vijay Kumar bad ki Nonghikai SSA bad ki 4 teachers.
Haba kren ha kane ka sngi, u Myntri Rangbah ka Jylla, Conrad K Sangma, haba ai khublei ïa ka SSA bad ka 4th Teachers Association na ka bynta ka prokram ai khublei u la ong ba ka jingïaid lynti ka la long kaba jrong bad kaba eh da kaba bynrap, “Phi la ïaid lyngba shibun ki jingjynjar, ki jingaiti bad ki jingïaleh hynrei nga sngewkmen ba nga lah ban long shibynta jong kane ka jingïaid lynti naduh u snem 2016 ha ka por ba dang long MP bad ban wanrah ia ka jingpynbeit ban pynthikna ba ïa ki jingshakri ba la ai da ki nonghikai jong ngi yn ithuh bad ïa ka burom bad ka jingshong suk shongsaiñ kaba phi dei hok ban ïoh la ai ha phi.”
U la ong shuh shuh ba ka jingeh ka long kaba jylliew haduh katta katta hynrei da ka jingïatreilang jong baroh bad ka mon ban wad ïa ka lad ban weng ïa kane kaba la pynlong ïa ka Structured Pay Framework. “Nga ai khublei ruh ïa ki Seng jong ki Skul Meghalaya SSA bad ka 4th Teachers Association kiba ka jingshimkhia, ka jingminot bad ka jingaiti lut jong ki ka la sei ïa ki soh kiba jop,” u la ong.
Da kaba pynpaw ïa ka jingkmen kaba khraw ban pyntreikam ïa ka SPF naduh ka 1 tarik u ïaiong 2026, u la ong ba ka dei ka sienjam kaba kongsan ban ai ka jingïada kaba kham bha ha ka imlang sahlang bad ha ka pisa tyngka bad ban ithuh ïa ka jingshakri jong ki nonghikai da kaba burom ban pynthikna ïa ka jinglong hok, ka burom bad ka jingshong shngaiñ.
U Myntri Rangbah ka Jylla u la ong ba ka jingpynrung ïa ka SPF ka dei kawei na ki por kaba pynhun bha ha ka jingim jong u bad ong, “Mynta ka sngi ban ïohi ïa ki jingphuh samrkhie ha ki khmat jong phi ka long kaba pynhun shisha namar ngi lah ban shakri bad pynkylla ïa ka jingim jong phi,” bad kyntu ïa ki nonghikai ba kin pynleit jingmut ha u khynnah bad ban buh ïa u khynnah skul ha shwa ban shim ïa kano kano ka sienjam ne rai.” Haba pynkut u la ong ba ka pule puthi ka dei ka mat ba kongsan tam jong ka sorkar bad ka bynta ka ban wanrah ia ka jingkylla bad ka jingroi ha ka jylla.
