U Principal ka St Anthony’s Higher Secondary School u Father A. Kharkongor haba kren sha ki lad pathai khubor u la ong ka Skul ka dap da ka jingkmen hadien ba ka St Anthony’s Higher Secondary School ka la wan biang shakhmat ha ka Exam HSSLC 2026 bad u ong ha ki snem ba la dep ka Skul ka wan beit shakhmat bad kane ka pyni ia ka jingnang kiew jong ka Skul Shaphrang ha ryngkat ka jingiatrei lang ki khynnah skul ka jingtrei shitom ka jingminot bad ka jingaimynsiem ki nonghikai bad ki kmie ki kpa jong ki khynnah skul.
Nalor kata u Father A. Kharkongor u la ong haba iatreilang ka wanrah ia ka jingjop kaba khraw la ka dei ha sport ne ha kano kano ka bynta ruh bad ka jingaimynsiem ia ki khynnah ka dei kawei ba kin long minot bad ba kin don ia ka thong bad ka jingtreishitom ba man ka sngi, ka jingminot kane kaba pynlong bad wanrah ia ka jingjop.
Haba ioh ban iakren bad ki khynnah kiba la wan shakhmat na ka liang u Joziah Daman Laloo uba wan ha ka kyrdan kaba 2 ha ka Arts Stream u la ong ka thong ka long ban long Professor bad ban shim ia ka Subject English bad u la kyntu ia kiwei ba kin don da ka routine ha ka por ban khrehkot khnang ban poi sha ka thong.
Haba ioh ban iakren bad u Amos Chiniminlun uba wan ha ka kyrdan kaba 2 ha ka Science Stream u la pynpaw ia ka jingsngewkmen hadien ba la wan ha ka kyrdan kaba 2 ha ka Science Stream bad ai khublei ia u Blei ia ki kmie ki kpa kiba la kyrshan ia u bad kumjuh ia u Principal ki nonghikai skul bad kumjuh ia ki paralok.
Nalor kata u la ong haba iadei bad ka jingpynkhreh ia ka exam HSSLC u la khrehkot naduh kaba sdang skul bad ha ka por ba lah jan ka Exam u khrehkot kumba 10 haduh 11 kynta bad kane ka pynlong ban poi sha ka jingjop bad ban ioh ia ka kyrdan kaba 2 ha ka Science Stream HSSLC 2026.
Na ka liang ka Reshika Debnath kaba wan ha ka kyrdan kaba 3 ha ka Commerce Stream ka la pynpaw ka jingkmen bad ai khublei ia ka hymmen kaba la iarap ia ka ha ka jingpynkhreh ia kane ka exam bad kumjuh ia u nonghikai Tution ba lah iarap ia ka ha ka jingpynkhreh ia ka exam HSSLC 2026. Ka Reshika Debnath ka la pynpaw ba ka khrehkot tang shi kynta haduh 2 kynta bad ka la pynpaw ba ka kwah ban pule BCom bad ban long Chartered Accountant.
