Ka Dorbar Chnong Chilliangraij, Jowai kum shibynta ban pyndep ia ka rukom dustur ba la hikai da ki longshwa manshwa, hashwa ba kin leit hiar rep sha ki hali pynthor jong ki, kila ioh ban pyndep shwa ia ka Bamphalar jong ki mynta u snem.
Ia kane ka Bamphalar la pynlong da ka Art & Culture Committee jong ka Dorbar Chnong Chilliangraij kaba la sdang naduh ka 7 tarik bad kut ha ka 9 tarik mynta u bnai.
Ki drama kiba ki paidbah kila ioh ban sakhi ha kine ki ar miet jong ka Bamphalar ka Chilliangraij ka dei ka DUHAI kaba la thoh da u K.C. Roy Pde bad ka JUBANLAK kaba la thoh da u Sumarlangki Rngad.
Ha ka miet pyni drama jong ka miet ba ar ka Bamphalar kata ha ka 8 tarik la wan ban sakhilang da u ma Thymme Pde kum u kongsan.
U ma D.H. Pde, Waheh Chnong haba ai jingkren sdang ula kyntu ia ki khun jong ka Dorbar Shnong ban long kiba im sngi ban pynjanai ia kane ka rukom ka dustur kaba la pynmlien da ki longshwa manshwa.
U ma Thymme Pde ha ba kren ula iathuh ia ka nongrim jong ka Bamphalar kaba la shim bynta da ki khun ki hajar ha ki dong bad shnong bapher bapher hapoh Jowai.
Kiwei de kiba la ai jingkren ki kynthup ia u ma Oriland Shylla, General Secretary bad u ma Lamphrang Shylla, Secretary Art & Culture Committee.
Ia kane ka Bamphalar la pynkut ha ka 9 tarik ha kaba ka la don ka jingiabam khana ha Yungwalieh (Hall) da ka jingiashim bynta jong baroh ki khun ka Dorbar Shnong.