Ki Pulit jong ka Umkiang PPP katba ki dang ap pahara ha ka 13 tarik mynta u bnai bad ha ka por kumba 2:30 baje ei ei mynstep kila ioh bat ia kawei ka kali Hyundai Eon kaba don ia u Registration Number: AS-10-A-5916 kaba dang thmu leit sha Silchar.
Ha ka jingkhynra ia ka kali ki Pulit kila ioh ban kurup haduh 30 hajar tylli ki tiar pynbthei (Explosive Detonators). Ia kine ki tiar la song bha hapoh ki ar tylli ki synduk kot bad kawei ka pla byrni ia kiba la thmu ban shalan beaiñ.
Ha kaba iadei ba kane ki Pulit ka Umkiang PPP kila kem ia ki ar ngut ki briew kiba don ha katei ka kali kiba kynthup ia u Kamrul Ali Laskar, na Jamalpur, Cachar, Assam bad u Ibrahim Uddin Laskar, na Loknathpur, Cachar, Assam.
La rejister case ia ki katkum ka Lumshnong PS Case No.25(05)2026 U/S 61(2) of the R/W Sec.5 of the Explosive Substance Act, katba ka jingtohkit ia kine ki ar ngut ka dang iaid shaphrang ban lap dien ia kiwei kiba donkti ha kane ka kam khaïi beaiñ ia ki tiar pynbthei.
Kane ka long katkum ka khubor ba la pyllait da u Superintendent of Police, East Jaintia Hills District, Khliehriat, u Pankaj Kumar Rasgania, IPS.