Ki nongshong shnong ka Lapangap West Jaiñtia Hills District mynta ka sngi Palei da ka jingthmu ban leit rep sha ki hali haka por mynstep 10 baje, hynrei ki paid Karbi kila mih ban khang lad pynban ïa ki ban leit rep sha ki bynta ka Umshyrngan, Lakawang bad Trepynthor kiba dang hap hapoh ka shnong Lapangap.
Kane ka jingleh ki Karbi kala pynbitar ïa ki nongshong shnong ka Lapangap, khamtam eh ki nongrep namar ka por rep kala dei ïa ki, uwei na ki nongshong shnong ka Lapangap uba dei ruh u Secretary ba rim jong ka shnong ma Monbha Pyrphet haba ïakren bad u, ula pynsngew ba ki jingkular ka sorkar hynnin ka sngi ha Shillong kim long satia kiba seisoh bad haduh mynta ka sngi ki nongrep kim pat ïoh lad satia ban leit rep.
Shuh shuh u ma Monbha Pyrphet ula ong kum ki nongrep ka shnong Lapangap kin ap sa tang shi sngi ne ar sngi ïa kane ka jingïakren pynbeit, lada ki nongrep kim ïohlad shuh ban leit rep kim banse ban leit mih khambun sha Secretariat ban pynsngew ïa kane ka jingeh kaba ki ïa kynduh.
Na ka liang ki bor District naduh u Superintendent of Police ka WJHD, BDO, ki ophisar bad ki pulit kila wan hiar mynta ka sngi sha Lapangap ban leit synran lang ïa ki nongrep hynrei kitei ki Karbi ki khlem shah ïa ki ban leit rep, hadien ka jingleit ïakren jong u SP bad ki pulit ka Assam la ïoh jubab na u MLA ka Tahpat ban ai por shisngi shwa khnang ban ïoh pynbeit bad ki briew jong ka Karbi ban lait na kino kino ki jingjia.
‘Ka sorkar kala dei ban phah wanrah noh da ki shipai CRPF ki ban wan parahar ha kitei ki jaka khappud, namar ki pulit ka jylla kim lah ban leh eiei khlem da ïoh ka hukum na ki bor ba halor’ khnang ba kane kan wanrah ïa ka shongsuk shnong saiñ jong ki nongshong shnong ha khappud.
Kaba sngewsih shuh shuh ula ong haka por ba ki nongrep kila wan rep na ki jaka rep, hynrei la wan ban pynjulor hadien pat da kitei ki briew jong ka Karbi bad ka long lehnohei ïa katei ka umsyep kaba kila leit rep. Wat ki pulit SF-10 kiba la kular ban phah sha Lapangap kim shym la wan poi mynta sha katei ka shnong, ong u ma Monbha.
Haba ïakren bad u Waheh Shnong ka Lapangap u ma Deimonmi Lyngdoh ula ïathuh ka jingïakren pynbeit mynta ka sngi hadpeng u SP ka WJHD bad ki bor pulit ka Assam baroh shisngi kam shym la poi shaei shaei ruh.
Wat ki nongrep ka shnong kiba la thmu ban leit rep mynta ka sngi naduh ka por 10 baje mynstep ha ryngkat ki pulit pynban kim shym la ïohlad satia, namar ki paid Karbi naduh ka por step kila lum shwa ïa ki paidbah ban leit khang ïa kino kino ki nongrep na ka shnong Lapangap.
U la ong ruh wat ki Pulit SF-10 kiba la kular da ka sorkar hynnin ka sngi ban pynpoi sha Lapangap kim shem la wan poi satia, ula pyntip la kumno kumno ki lah ban wanpoi ha ka por janmiet, kum ka shnong kam banse ban shim noh ïa ka rai ha ka jingïalang paidbah lashai ka sngi 15 tarik u Jymmang ban pynbeit ïa kane ka jingeh lane yn leit tur biang sha Secretariat.
