Hadien palat laiphew snem ba la tep kynrong ia ka Syiemsad Hima Sohra ka ba la iap naduh u snem 1994, ka longiing longsem jong ki Syiem Sohra ki la pynlong ia ka riti thang syiem ha ka 16 tarik Jymmang, 2026 ha ka kpep ba la pynkhreh kyrpang na ka bynta ka Mei’yiem Iartimai Syiem. Ka riti leh niam la pyniaid da u Lyngdoh na ka Raij Mawshuit ha ryngkat ka Shyngwiang ka ba dei ka shad bad ka put ka tem na ka bynta ki ba iap. Ki ba la shimbynta ba kongsan ha ka niam iap ki long ka Syiemsad ba mynta, ka Mei’yiem Costlymai Syiem bad u Syiem shong khet mynta u Marremdor Syiem, ha ryngkat u myntri na raij Swer Bah S. Nongrum ba ju nam kum u kñi syiem na ka daw ba u basan Swer u ba long myntri ba nyngkong eh jong ka Hima Sohra u la wan rah syiem synshar sha ka Hima Sohra mynnor bad kata ka nam la pyrto ha ki pateng long myntri haduh mynta mynne. Kiwei kiwei ki kynrem lyndan na kylleng ka Ri Khasi ki la ia don ryngkat ban shim bynta ha kane ka riti ka ba shisien shi jingim.
Katkum ka riti dustur tynrai ka lehniam la pyniaid da u Lyngdoh na Raij Mawshuit u ba dei na ka tynrai jong ka longsyiem mansyiem ka Hima Sohra. Ki raij ki ba longtrai ia ka Hima Sohra ki dei na Khatarshong bad Khathynriewshnong nalor kiwei kiwei ki raij ki ba la iasnoh lang ha ka Hima Sohra. Dang shen la thung ia u Marremdor Syiem kum u syiem pura jong ka Hima Sohra hadien ba u la pyndep ia ka niam ka rukom ban pynkhuid ia ka met basah jong u Syiem Freeman Sing Syiem ha ka 5 tarik Naiwieng, 2025, bad mynta u la shimti ruh ban thang ia ka Syiemsad ba mynshwa, ka ba dei ka kmierad ka ba la iap naduh u snem 1994. Kumta ka kyrdan longsyiem jong u Marremdor Syiem ka long ka ba la pura bad la pynskhem ym tang da ki longsan mansan, hynrei ki khun ki hajar salonsar ki la kyrshan ia ka nam longsyiem khlem da khohñioh ne artatien.
Ka lehniam iap ia ka kmierad jong u Syiem Marremdor Syiem ka dei katkum ki riti dustur tynrai ba la buhti ki longshwa manshwa ba u dei hok ban long u syiem ba pura khamtam ba dang shen u la pyndep ia ka riti ban pynkhuid ia ka met jong u syiem rangbah u Freeman Sing Syiem. Jar la katta ka Dorbar Thawaiñ Dalariti ka la kyntait ban ai sanat ia u Syiem Marremdor Syiem na ki daw ba khlem nongrim bad ki ba pynkheiñ ia ki riti dustur tynrai. Kumta ka Dorbar Himna Sohra ka la pynkhreh ban leit ia kynduh biang sa shisien ia ki longsan mansan ka Dorbar Thawaiñ Dalariti ban dawa Ia ka hok katkum ki riti dustur tynrai bad katkum ka mon jong ki khun ki hajar ki ba la leit teng ha kine ki sngi ban dawa ia ka hok jong u Marremdor Syiem kum u syiem pura jong ka hima Sohra.
Baroh ki ba kren ha katei ka sngi ki la kynthoh ia kane ka bynta ka ba la pynkheiñ riti da kata ka shlem ka ba dei ban pynksan ia ki riti dustur tynrai, kata ka Dorbar Thawaiñ Dalariti ne kata ka KHADC. Hynrei ka syiemsad ba mynta ka Costlymai Syiem ka la kren khia thew khlem da kynthoh iano iano hynrei ka la pyrto ia la ka kmie ka ba la thehsei ia ka jingieit kum ka syiemsad ia la ki khun syiem bad ia ki khun ki hajar salonsar bad ka da duwai ban kyntu ia kito ki ba bat ia ka iktiar ba kin ioh ka jingshemphang ha ka ba yn ai ka bishar hok na ka bynta u syiem longsyiem jong ka Hima Sohra u Marremdor Syiem u ba dei u khun jong ka. Kumta ka la don ka duwai ka phirat da u Lyngdoh na raij Mawshuit da u khaw bad ka um ryngkat ka diengtyllaw ban leit thang ia ka Meiyiem, bad la bud ruh ka shad shyngwiang katkum ka riti dustur.
Ha ka jingkren jong ki kynrem lyndan baroh ha kata ka sngi lehniam ban pynkhuid ia ka met jong ka Syiemsad Iartimai Syiem. Hadien kata la leit onthang donburom ia ka syiemsad Iartimai Syiem ha ryngkat ka krong bad ka tabut ba la rah naduh tyngkong iingsad haduh ban da poi ha kpep na ka bynta ban sei ia ki shyieng ban sait pynkhuid shwa ban thang ha kpep ba la pynkhreh na ka bynta ban thang donburom ia ka Syiemsad Iartimai Syiem. U ksiew ba longsyiem pura u la shimti ban pyndep ia ka niam ka rukom na ka bynta ban thang ia ka met basah ha ka kpep. Ynda la thang ia ka met jong ka Syiemsad Iartimai Syiem la noh kwai da u syiem bad la ka kmie, ka syiemsad ba la bud ryngkhi da ki kur syiem nangta sa ki kynrem lyndan na kylleng ka ri Khasi bad baroh ki paidbah ki ba la wan onthang ia ka Meiyiem Iartimai Syiem. Hadien ba la dep ka niam ka rukom ban pynkhuid ia ka met la wer ia baroh ki paidbah ban leit bamja ha iingsad ka syiem bad u syiem synshar na ka bynta ba ka mynsiem jong ka syiem\sad kan leit suk sha dwar ki blei.