Ha ka 16 tarik u Rymphang 2026, ka Kyrmen Foundation ha ryngkat ka jingiatreilang bad ka Rangdajied United FC, ka la plie ia ka Kynsai Season 2 — ka prokram ai jinghikai phutbol khlem jingsiew kaba shisnem — ha madan artificial turf jong ka East Jaiñtia Hills District Sports Association ha Deinshynrum, East Jaiñtia Hills District.
Ha kane ka sngi la don lang u Kongsan u Manish Kumar, IAS, Deputy Commissioner ka East Jaiñtia Hills District; Kongsan u ma Kyrmen Shylla, MLA ka Khliehriat Konstitwensi; u Eugeneson Lyngdoh, President ka Rangdajied United FC; u Lasky Rymbai uba long u Deputy CEM ka JHADC; u Shri Wailadameshwa Siangshai, MDC ka JHADC; u Shri P. Nongtdu uba dei u nongpyniaid jong ka JEC; ki ophisar na ka Kyrmen Foundation; ki kmie ki kpa; bad ki khynnah ba la jied na ka bynta ka prokram ai jinghikai khlem jingsiew.
Ha kane ka prokram la ioh ia ka jingpyllait ia ki balloon da ki nongwan iashim bynta, ha kaba la wan ban iashim bynta da ki nongialehkai, hadien kata la don ka jingshon dur kynhun.
U Deputy Commissioner u Manish Kumar haba kren kum u Kongsan u la ai khublei ïa ka sports committee kaba la pynlong ïa kane ka jingïalehkai. U la ong ba ki samla jong ka Meghalaya ki dei ka tynrai jong ka roi ka par bad ba ka jingai lad ka long kaba donkam bha. Namar ba shen yn sa pynlong ïa ka National Games ha Meghalaya, kane ka prokram ai jinghikai kan ïarap ban pynïasoh ïa ki samla ha ki kam ïalehkai.
U la kdew ba ka jingialehkai ka lah ban long ka kam bad kyntu ia ki samla ban trei shitom. U la ban jur da kaba ong ban mad ïa ka jingjop dei ban pdiang ruh ïa ka jingrem, u la ai khublei ïa ka Kyrmen Foundation kaba la ailad ïa ki samla lyngba kane ka prokam, bad pynpaw ka jingkyrmen ban ïohi shuh shuh ïa ki samla kiba jop na ka distrik. U la bynrap ruh ba ka bor synshar district ka kyrshan ïa ki jingtei ïalehkai lyngba ka skhim DMF.
U MLA u ma Kyrmen Shylla u la ong ba ka East Jaiñtia Hills mynshwa ka long kaba skhem ha ka liang ka pisa tyngka hynrei mynta ka la duh noh ia kane ka. U la bynrap ruh ba bunsien ki briew kim lah ban poi sha ka thong namar ba ki duh jingshaniah ha lade, bad u la kdew ruh ïa u Cristiano Ronaldo kum ka nuksa jong ka jingngeit ha lade. U Shylla u la batai ïa ka prokram ai jinghikai kum ka sienjam kaba ar, ha kaba ka kyrdan kaba nyngkong ka dei ka dohnud bad ka jingkwah jong u nongïalehkai.
U la kyntu ïa ki 100 ngut tam ki nongïalehkai kiba la shah jied ha ki trial ba kin pyndonkam hok ïa ka kabu bad ban trei shitom. U la ai khublei ïa ki kmie ki kpa kiba la ai ka jingkyrshan jong ki, da kaba ong ba khlem ka jingkyrshan jong ka longïing wat ki nongïalehkai ba tbit ruh ki lah ban nym jop. U la kyrpad ia kito ki bym shym la shah jied mynta ka samoi ba kin long kiba iaishah bad kular ba katba u dang shakri kum u MLA un pynthikna ba kum kine ki trial kin long man la u snem ryngkat ka jingiatreilang bad ka Rangdajied United FC. U la bynrap ruh ba ki don kiba haïing hasem jong u hi ki bym shym la shah jied mynta u snem namar ba kim biang ïa ki kyndon ba la buh.
