Ka Hynñiewtrep National Youth Front (HNYF), West Jaiñtia Zone mynta ka lah sngi u Blei 18 tarik u Jymmang kala leit hiar sha shnong Lapangap da ka jingthmu ban leit synran ïa ki nongrep sha ki jaka rep jong ki ha ka shnong Lapangap, hynrei ynda la poi ha katei ka jaka la wan hiar syndon da ki hajar ngut ki pulit Assam kiba la kiar sawdong bad khang lad ïa ki nongrep ban leit hiar sha ki jaka rep.
Halor kane ka seng kala pynrem jur ïa ka sorkar halor ka jingsahteng jong ka jingïakren ïasuk haduh mynta, hapdeng ka jylla Meghalaya bad ka Assam kaba khlem sei soh eiei.
La ong ruh ba ka sorkar Meghalaya kala kular ban buh Security da ki SF-10 hynrei la sakhi mynta ka sngi ha katei ka jaka ïakhajia kila don tang kumba 10 eiei katba ka Assam kila wan poi da ki hajar ngut ha ryngkat ki tiar ki tar. Kaba la khanglad syndon ïa ki nongrep ban ïoh leit rep sha ki pynthor jong ki.
Shuh shuh ka seng kala pynrem jur ïa ka sorkar Meghalaya kaba la kut tang ha ki jingkular ïa ki nongshong shnong ka Lapangap, hynrei ki kam pat kim urlong satia kumba la kren, la pynkut ka kyrwoh na u Vice President ka West Jaiñtia Zone samla C. R. Ryngki.
