Mynta ka sngi ka 18 Jymmang 2026, ka Seng Voice of the Peoples’ Party (VPP), East Jaiñtia Hills District ka la pynlong ïa ka jingïalang bad ki nongthoh khubor ha ophis jong ka ha Dkhiah West.
U President ka Party East Jaiñtia Hills District u ma Damewanhi L. Rymbai haba kren sha ki lad pathai khubor, ha ka jingïadonlang ki dkhot ka party, u la pynbna ba ka VPP kan sa pynlong ïa ka jingshong kyllaiñ myngngor kaban long ha ka 20 Jymmang 2026 naduh ka por 10:00 AM haduh 5:00 PM hakhmat u mot jong u Mot u Kiang Nangbah u ba don ha khmat ka ophis u Deputy Commissioner, East Jaintia Hills District.
U ma Rymbai u la ong ba kane ka jingiakhih kan pyrshah ia ka jingpynsngew paidbah na ka bynta ka jingthmu buh ia ka karkhana Shree Cement ha Elaka Nongkhlieh. U la pynkynmaw ba ka seng lyngba u MP ba la khlad noh u Dr. Ricky A. J. Syngkon mynshwa ka la aiti ïa ka shithi sha ka sorkar pdeng ban kyrpad ban pynsangeh noh ïa kane ka projek bad ba ka seng ka la ïai bteng ban buddien ïa kane ka kam.
U ma Rymbai u la ong ba bun ki seng saiñ pyrthei, ki seng treimon sngewbha, bad ki nongialeh pyrshah ki la pynpaw ia ka jingpyrshah, hynrei ka sorkar kam shym la jubab. U la kynnoh ba ka jingpom dieng bad ka jingpynjot ia ki tyllong um ka dang jia haduh mynta ha Nongkhlieh. “Ngim lah ban shupeit kai katba kine ki jingshah pynjulor ki dang ïai bteng,” u la ong da kaba bynrap ba ka seng ka ieng ryngkat bad ki paidbah ka District bad ka pynrem jur ïa ka jingpynïaid jong ka Sorkar Jylla halor kane ka kam.
U la kyntu ia ka sorkar ban pynsangeh noh ia ka projek Shree Cement bad ban ailad ia ki briew trai shnong ban sdang biang ia ki kam tih dewiong. U bah Rymbai u la ong ba lada ka sorkar ka thaw ia ki polisi kiba iahap ia ka kompeni cement, ka dei ruh ban thaw ia ka lad kaba iaryngkat ia ki nongtih dewiong trai shnong khnang ba ki nongshong shnong jong ka district kin ioh kamai jakpoh. U la kyntait ia ki jingkynnoh ba ka jingtih dewiong ka la pynjulor jur ia ka mariang, da kaba ong ba ka mariang ka la iaineh wat hapdeng ka jingtih palat shispah snem ïa u dewiong, katba ka jingtih mawshun na ka bynta ka jingpynmih cement ka ktah kham bun shah ia ka mariang.
Ka VPP ka la pynbna ba ka jingthmu jong ka jingshong kyllaiñ myngngor ka long ban pynbor ia ka sorkar halor ar tylli ki jingdawa: kaba nyngkong ban pynduh noh ia ka projek Shree Cement, bad kaba ar ban ailad ia ki kam tih dewiong ha ka thaiñ khlem da donkam ia ka jaka kaba heh 100 hektar. U Rymbai u la kdew ba don ka seng kaba mihkhmat ia ki nongtih dewiong ka la pynlong ia ka jingialang ha u bnai ba la dep bad ka la ai por ia ka sorkar lai bnai ban wanrah ia ka plan; hynrei haduh mynta na ka liang ka sorkar kam pat lah ban pynmih ia ka plan na ka bynta kane.