Mynta ka sngi ka 19/05/2026 ki nongshong shnong ba kynthup na ka Shnong Shnongrim, ka Shnong Tongseng, ka Shnong Daistong bad ki shnong ba marjan kiba dei ki trai jaka ka Lum Syrman, Elaka Nongkhlieh ka jaka kaba ka Shree Cement Limited ka thmu ban pyllong Public Hearing ban tih ïa u Mawshun, kila pynlong da ka jingïalang paitbah ha Shnongrim ban pynshai ïaka jingkren u Secretary ka Elaka Nongkhlieh bad ki katto katne ki dkhot ka Elaka haka 16/05/2026 ha Shnong Mollasngi.
Kila ong ruh ba ki la dep siew bai lutsan bad dep ïa kut bad ki trai jaka ha lum Syrman, hynrei naka liang kitei ki trai jaka kila pynshai ba ym don kum kata ka jingsiew ne jingïakut bad baroh ki jingkren jong ki ki long bym dei satia, kum ki trai jaka ngi kyntait mardor ïaka jingkren jingpynshai jong u Secretary ka Elaka.
Shuh shuh kila pynsngew ba ka jingong jong u ruh ba ym shah ïaki sengbhalang hapoh ka Elaka ruh kadei ka rai jong ki katto katne ym ka rai u paitbah ne ka rai ki nongshong shnong ka Elaka. Kumta naka liang ki trai jaka bad ki nongrep ki ïeng haka nongrim ban dawa ïa ki hok jong ki bad ban pyrshah ïa ka Public Hearing jong ka Shree Cement Limited ban pynlong Hearing haka jaka jong ki ka ban long haka 22/05/2026. Kitei ki trai jaka kila kyrpad jur ïaka Sorkar Meghalaya kaba hapoh ka jingïalam u Conrad Sangma ban leit tohkit bha na ki trai jaka ban tip ïaki jingshisha ha shwa ba kin ïaid shakmat ban pynlong ïaka public hearing.
Lada ka sorkar ka pynïaid beit iaka public hearing ka jingïaum snam kan jia ha katei ka sngi. Namar kum ki trai jaka bad ki nongrep kim hun baka jaka jong ki kan duh ei. Kumba kila dep buh ujor sha baroh ki bor badei peit kyrmen ba kin sngap ïa ki jingeh jong ki kum ki trai jaka pynkut ki nongshong shnong.
