Ki nongialam jong ka Jaintia Coal Owner Miners Suppliers & Workers Association (JCOMSWA), ba kynthup ia u ma Marshall SB Biam, President bad u ma Khrawbor Ryngkhlem, General Secretary, mynta ka sngi ki la leit ban buh dorkhas ha ophis jong u Deputy Commissioner ka East Jaintia Hills District, na ka bynta ban pyntip bad ruh ban pan bor ban ioh pynlong ia ka prokram jingiakhih jong ka da kaba shong shah thngan khlem da buh por tad haduh ba ka sorkar kan sngap ia ki jingdawa jong ka seng.
Na ka liang ki nongialam jong ka seng kila pyntip sha ki lad pathai khubor ba lada ki ioh ne kim ioh bor na ki bor pyniaid District ruh, hynrei kin iaid beit shakhmat ia kane ka prokram jingiakhih ba jai jai jong ki kum ka dak ban pynbor ia ka sorkar ba kan shimkhia noh ban ai lad ne shah noh ia ka jingtih dewiong hapoh ka District.
Ia kane ka jingshong shah thngan ba khlem buh por yn sdang naduh ka 1-06-2026, ka ban sdang naduh ka por 10:00 baje mynstep ha jaka ba don u Mot Kiang Nangbah, ha phyllaw jong ka ophis u DC, Khliehriat, East Jaintia Hills District.
U ma Marshall u pynpaw ba ka jingshim jong ka seng ia kane ka lynti ka long hadien ba kala dep ban kyrpad la bun sien ia ka sorkar jylla, ban pyrkhat lem ia ka jingeh kaba ki nongshong shnong jong ka thaiñ East Jaintia Hills ki iakynduh naduh ba la khang noh ia ka jingtih dewiong da ka NGT naduh u snem 2014.
Kumta ka JCOMSWA lyngba kine ki prokram iakhih jong ka, ka dawa ba ka sorkar jylla kan thaw ki aiñ kiba shah ia ki nongshong shnong ban iohtih ia u dewiong da ki trai jaka ne ki riew paidbah ha ryngkat ka jingpynneh pynsah ia ka mei mariang katkum ka juk jingstad ba mynta. Ha ka juh ka por ka kyntu bad dawa ruh ia ka Jaintia Hills Autonomous District Council (JHADC) kaba dei ka nongbat nongpeit ia ka khyndew ka shyiap, ba kan shna ki aiñ kiba iadei bad u dewiong katkum ki kyndon kiba iadei bad ka jingbat ia ka khyndew ka shyiap da ki trai jaka, khnang ban ailad ia ki trai jaka ban trei ia ka kam tih dewiong, kumba la pynksan da ka ïingbishar ba hakhliehduh jong ka ri India (Supreme Court), shaphang ka jinglong trai ia ka jaka da ki nongshong shnong jong ka thaiñ.
Ka JCOMSWA ka khot bad wer ia ki nongshong shnong jong ka thaiñ ba kin ai ka kti ka mon kti ka diang ban ia kyrshan lang ia ki jingdawa jong ka seng khnang ba yn lah ban wan rah biang ia ka ioh ka kot hapoh ka District bad ba ki hajar ki nongshong shnong kin lait na ka jingiap thngan.