U Myntri Rangbah ka Jylla Conrad K Sangma ha ka 22-05-2026 ula iashimbynta ha ka “MLA Connect” ha ka shnong Matchikolgre, ha sor Tura kum shibynta jong ki jingpyrshang ba iai bteng ban pynkhlaiñ ia ka jingiakynduh bad jingiakren markhmat bad u paidbah.
Ha kane ka jingialang, u Myntri Rangbah ula ioh iakren ia shibun kiei kiei bad ki nongshongshnong, ki nongialam shnong, ka seng samla, bad ki kynhun bapher bapher na ka shnong.
Ki Nongshongshnong kila pynsngew ia bun ki jingsngewkhia haba iadei bad ki surok, ki nala, ki jaka leit bar, ka bording elektrik, ka jingsam um bad ki jingtei ha jaka sor. Ki paidbah kila pynpaw ba ki kali lum niut kim lah ban poi sha ki katto katne ki bynta jong ka shnong ha ka por lyiur namar ka jingbtuid jong ka surok, kaba lam sha ka jingeh ha ka jingleit lum ia ki niut ki nier.
Haba jubab, u Myntri Rangbah ula bthah ia ka Tura Municpal Board (TMB) ba kin wad ia ki lad ki lynti ba shipor ban pynthikna ia ka jingleit lum niut ba khlem sangeh hapoh ka shnong. Ula pynpaw ruh ba ka Sorkar kan sa shong bishar ia ka jinglah ban pyndonkam noh da ki kali 4X4 ban lum niut khnang ban lah pynpoi ia ki kali sha ki jaka kiba long sharing bad ha ka por ba sniew ka suinbneng.
Ha ka jingiakren, ki nongshongshnong bad ki nongialam shnong kila pynpaw iaka jinglong jingman jong ki skul primary ki bym dei jong ka Sorkar, kiba don haka shnong bad pynsngew ia ka jingsngewkhia haba iadei bad ka jingduna ki jingtei kynthup ki kynroh, ka bording bad ka jingai um, bad ki painkhana. La kyrpad ruh ban pynioh ia ki jaka lehkai na ka bynta ki khynnah kiba don ia ki swing, slide bad kiwei ki tiar ialehkai. U Myntri Rangbah ula kular ba un sa khmih bniah ia kine ki jingpynsngew na ka bynta ban ai ka jingkyrshan bad ban leh eiei.
Kawei ka seng ki samla kala kyrpad ia ka jingkyrshan na ka bynta ban shna ia ka madan ialehkai basketball bad kiwei ki jingtei ba iadei bad ki samla. Haba jubab ia kane, u Myntri Rangbah ula kular ban ai jingiarap ha ka dur jong ki tiar tem bad ki tiar ialehkai na ka bynta ki Youth Club ban pynshlur ia ki samla ba kin leh ia ki kam kiba tei, ki kam ialehkai bad ki kam ba iadei bad ka kolshor.
Ki nongshongshnong kila pynpaw ruh ia ka jingsngewkhia halor ka jingheh ka bill bording hadien ka jingpyndait ia ki smart meter. Ki Ophisar na ka MeECL kila pynshai ba mynshuwa, kiba bun ki longiing kim don satia ia ki smart meter lane ki meter ba ju pyndonkam mynshuwa, bad bunsien la shna ia ki bill kat kum jingkhein ba shu antad. Da ka jingpyntreikam ia ki smart meter, ia ka bill la shna kat kum ka jingpyndonkam ia ka bording.
La pyntip ba ka kynhun kan sa leit sha kane ka shnong ha ka sngi Nyngkong ban peit ia kane ka kam. La kular ruh ia ki nongshongshnong ba lada ki jingeh ki dei kiba shisha lane lap ia ki jingbakla ha ka jingshna bill, ka tnad kan sa shim mardor ia ka lynti ban pynbeit.
Ha kane ka jingialang, u Myntri Rangbah ula kren ruh ia ka jingkongsan jong ka jinglum khana samari halor ka ioh ka kot ba dang iaid mynta bad kyntu ia ki nongshongshnong ba kin iasimbynta ha kane ka jinglum samari. Ula pynpaw ba ka khana samari ka long kaba kongsan bha ia ki longiing kiba duna ka jingioh bad ki BPL, namar ka jingkhein kaba beit ka long kaba kongsan na ka bynta ka jingshna ia ki plan, ki skhim ka bha ka miat, bad ka jingpynpoi ia ki jingmyntoi ba ai ka Sorkar sha kiba dei hok.
Haba ai jingkren, u Myntri Rangbah ula iai ban ia ka jngkut jingmut jong ka Sorkar ia ka synshar khadar kaba buh hakhmat eh ia u paidbah bad ka jingiashimbynta lang ha ka roi ka par.
