U Symbud Myntri rangbah ka jylla uba dei ruh u myntri kam poh iing ka jylla u Bah Prestone Tynsong u la ong ba ka jingwan jong u Myntri kam poh iing ka sorkar pdeng u Amit Shah sha Shillong na ka bynta ka Plenary Session jong ka North Eastern Council ka wanrah ia ka kabu kaba kongsan ia ka sorkar Meghalaya ban rah biang sa shisien ia ki mat ba kongsan kiba iadei bad ka jylla bad ka Sorkar pdeng.
Haba kren sha ki lad pathai khubor u Bah Prestone Tynsong u la ong ba ka Sorkar Jylla kan sa pynksan biang ia ka jingdawa ban pyntreikam noh ia ka Inner Line Permit (ILP) ha Meghalaya bad ban pynrung ia ka ktien Khasi ha ka Khyrnit kaba phra jong ka Riti Synshar ka Ri India. U la pynpaw ba kine ki ar tylli ki mat ki dang long kiba kongsan tam na ka bynta ki paidbah bad ka jylla Meghalaya. Kat kum ka jingong jong u, ka sorkar ka la dep ban rah ïa kine ki jingdawa ha ki snem ba la dep bad kan pyndonkam ïa kane ka kabu ban ïakren biang sa shisien bad u Myntri kam pohïing ka sorkar pdeng u Amit Shah.
Haba kylli halor ka projek lynti rel, u bah Prestone u la ong ba ka jylla mynta ka buh hakhmat eh ia ka ILP bad ban pynrung ia ki Khasi ha ka Eighth Schedule. U la bynrap ruh ba ki jingiakren halor ka jingpyniasoh rel ki lah ban long hadien, ynda la lah ban pynbeit bha ia ki jingeh jong ki paidbah ha kaba iadei bad ka jingiada ia ki jingmyntoi jong ki trai ri trai muluk bad ki lad jingiada na ka bynta ka jylla.
“Na ka liang jong ngi, kaba hakhmat eh ha kane ka khyllipmat ka dei ka ILP bad ka Eighth Schedule, lada kine ki jingdawa ki long kiba urlong, kiwei ki mat kum ka lynti rel lah ban iakren hadien”, la ong u Bah Prestone Tynsong.