Hadien ba ka seng KSU ka la ioh ka jingujor na ki paidbah ba bun balang kiba leit phah sumar ha Khliehriat Civil hospital ba ka don ka jingduna ki dawai na ka pharmacy sorkar kiba la don ha Civil hospital, ki paidbah ki iathuh ba kiba dei ban khmih ia kane ka hospital lane ki doctor bad ki nurse ki shait ong ia ki nongpang bad ki nongshim dawai ba duna ki dawai na ka pharmacy jong ka hospital, kumta kin hap ban thied nabar ki pharmacy ha ka dor ba rem.
Kane ka jingduna jong ki dawai sorkar ka la ktah shi katdei eh ia ki duk ki rangli kiba duna ka ioh ka kot kiba wan phah sumar ha kane ka hospital sorkar.
Kumta Ka KSU, East Jaintia Hills District Unit kaba la lam khmat da u President Ma Streamly S Suchen ha ka 3 tarik u Jylliew ka la leit ban iakynduh bad u District Medical and Health Officer DMHO Khliehriat bad ia u Medical Superintendent (MS) ban wad jingtip ba pura ban pyntikna ia kane ka jingujor ki paidbah.
Na ka liang u DMHO bad i Medical Superintendent ki ong ba ym don jingtip ba tikna halor ki jingdon ki dawai ha Hospital namar ba ia kane ka kam la aiti ha u Drug Inspector (DI) uba peit ia ar tylli ki district kata West bad East Jaintia.
Kumba long mynta ym pat don Drug Inspector ba pura hapoh ka East Jaintia Hills District, la pyntip kitei ki heh ka koit ka khiah.
Na ka liang u DMHO bad u MS ki la kular ban shim khia bad ban pyntip sha ki bor ba halor ban leh bad peit ia kane ka jingeh kaba ki paidbah ka East Jaintia ki iakynduh.
Ka seng ha dawa na ka sorkar ban thung noh kloi ia u Drug Inspector ha ka District bad ruh na ka liang ka seng kan leit iakynduh ia u Myntri ka koit ka khiah ban iakren halor kane ka mat.
