Ki Nongialam ka Khasi Student Union (KSU) ha ka 4 tarik Jylliew ki la wan iakynduh ia u Amit Shah Myntri ka Sorkar pdeng ha State Convention na ka bynta ban pynsngew haba iadei bad ka ILP, ka jingpynrung ia ka ktien khasi ka issue haba iadei bad ka khappud bad kiwei kiwei ki mat.
Haba kren sha ki lad pathai khubor na ka liang u President ka KSU u Samla Raymond Kharjana u la ong ka jingiakynduh bad u Amit Shah ka dei halor ka ILP ka border issue, ka jingpynrung ia ka ktien khasi bad kiwei kiwei ki mat.
Haba iadei bad ka ILP u la pynpaw ba u Amit Shah u khlem ai kano kano ka jingpyntikna hynrei na ka liang ka Seng kan iai pyrshang ban dawa ban ioh pyntreikam ia ka ILP hapoh ka jylla.
Nalor kata u la ong halor ka jingdawa ban pynrung ia ka ktien Khasi ha ka khyrnit kaba phra na ka liang u President ka KSU u la ong ba ki dkhot ka Khasi Author Society ki la don lang bad kin sa batai khambniah halor ka jingdawa ia ka ktien Khasi ban pynrung ha ka khyrnit kaba phra.
Haba iadei bad ka border issue u Amit Shah u la ong ba ka dei ka bynta jong ki Artylli ki jylla hapdeng ka Assam bad Meghalaya bad u la ong lada donkam na ka liang u Amit Shah un sa peit bad leh ia kaba donkam.
Khatduh u Samla Raymond Kharjana u la pynpaw ka seng ka ïeng ha ka nongrim naduh ba la seng ia ka, ki nongialam barim ki kren ia ki juh ki nongrim ki nongialam ba mynta ruh ki kren beit ia ka juh ka nongrim.
Ka jingiakynduh bad u Amit Shah ban ong kaba seisoh ne ka bym seisoh ruh um lah ban ong hynrei u Amit Shah u la shong bad u la sngap ia kaei kaba ka KSU ka la pynsngew haba iadei bad ki jingdawa ka Khasi Student Union la ong u President ka KSU Samla Raymond Kharjana.