Katba nanngiaid ki Kynta ki Sngi, nangtuid ki paidbah ban kyrshan ia ka jingshah thngan u President ka JCOMSWA, Marshal S.B. Biam na ka bynta ki paidbah ba kin ioh ban trei bad tih dewiong kumba ka long ha ki 12 snem mynshwa.
Hynne ka sngi 09/06/2026, da ki spah ngut ki longkmie bad ki longkpa na kylleng ki shnong jong ka East Jaintia Hills District ki la iawan ban kyrshan ia ka jingshah thngan jong u President ka JCOMSWA, ha Madan Ialehkai Bol ka Ladrymbai Dongwah bad hapoh ka jingialam jong u Tymmen Basan G.Rapbait Bareh kum u Chairman, la pynlong ia ka jingialang paidbah, ha kaba la ioh ia ka jingkren na u President ka Association (JCOMSWA) ma Marshal S.B.Biam, Vice President (JCOMSWA) ma Pyndap Shadap, Information Secretary ma Overcome Dkhar, na ka kong R. Syntem kawei na ki longkmie na Mynso bad ka kong Jhanika Siangshai kaba long ruh ka Vice President ka DPT.
U President ka JCOMSWA, ma Marshal S.B. Biam hapdeng ka jingtlot ka met na ka jingshah thngan kaba 194 Kynta, u ong “Ka jingshah thngan jong nga kam dei na ka bynta ka jingmyntoi ialade shimet, hynrei na ka bynta ka jingmyntoi jong phi ki phewhajar ngut ki Nongshong shnong jong ka East Jaintia Hills kiba la poi ha ka khim khait na ka daw ka jingkhang tih Dewiong jong ka Sorkar bad na ka bynta jong phi ki paidbah Nongshong shnong jong ka East Jaintia Hills District lada ym jubab ka Sorkar, ngan iaibteng ka jingshah thngan bad ai ba ngan iap na ka bynta jong phi ki hajar hajar ki longïing jong ka District kiba don ki par Dewiong ha ki jaka lajong bad kiba phim lah ban tih bad ban die Dewiong bad kane ka jingkhang tih Dewiong ka pynlong ia phi kat shaba phai ha ka kutlad”.
U ma Pyndap Shadap, Vice President ka JCOMSWA haba kren ha kane ka sngi, u pynpaw ka jingkmen ka bakhraw ia ka jingkyrshan jong ki paidbah ia ka jingshah thngan u President ka Association ma Marshal S.B. Biam na ka bynta ki nongshong shnong jong ka District East Jaintia Hills bad ki trai Dewiong kiba la shah khangtih Dewiong da ka Sorkar kaba la kynjoh sha ki 12 snem mynta bad kane ka jingkhang tih Dewiong ka Sorkar ka pynlong ia ki Nongshong shnong jong ka District ha ka jingkutlad ha baroh ki liang jong ka longbriew manbriew. Ha ka juh ka por haba kane ka jingshah thngan u President ka Association (ma Marshal S.B.Biam) ka long na ka bynta ki paidbah, hynrei pat shano ki Nongmihkhmat Paidbah MLA bad MDC jong ka East Jaintia Hills District kiba wan jngoh bad kyrshan ia ka jingdawa jong ka JCOMSWA bad ban pynsngew ia kane sha ka Sorkar pynban ki jah laitnoh tang u ma Daeimi Liam, MDC jong ka Shiliang Myntang.
Ha ka juh ka por u ma Shadap u pynpaw ia ka jingsngewnguh ia ka jingwan jngoh ki dkhot ka JNC bad ka JSU Central Body ban ia kyrshan lang ia kane ka jingdawa jong ka Association, (JCOMSWA) bad ban kyrpad ia ka Sorkar ba kan pyllait ne wengnoh shisyndon ia kane ka jingkhang tihdewiong bad ban ailad ba ki Trai Pardewiong kiba don la u Dewiong ha ki jaka lajong jong ki ban kin iohtih kumba ka long ha shwa ki 12 snem mynshwa.
[U ma Daemi Liam, MDC, ka 11-Shiliangmynta]