Ka All Meghalaya Domestic Workers Union (AMDWU) ka la ai khublei bad kitbok kitrwiang ia baroh ki nongtrei ïing ha ka sngi rakhe ia ka International Domestic Workers Day ka sngi kyrpang ia ki nongtrei ïing briew, ha kaba ka la pynpaw ia ka jingdonkam ban pynthikna ia ka hok kaba maryngkat, ka burom, bad ka jingiada ia kito kiba trei ha ki ïing briew.
Haba kren sha ki lad pathai khubor, ka Vice President ka AMDWU ka kong Elbina Mary Nongkhlaw ka la ong ba dei ban pynbiang barabor ia uwei pa uwei u riew shimet ha ka ioh kam ioh jam bad ha ka imlang sahlang. Ka la kdew ba ki kynthei ki ju mad ïa ka jingshah lehbeiñ bad ka jingbym lah ban ïoh jinghikai ha kine ki snem, da kaba pynksan ïa ka jingdonkam ban kyntiew ïa ka hok hapdeng ki kynthei bad shynrang ban thaw ïa ka imlang sahlang kaba ïaryngkat bad kaba lait na ka jingshah lehbeiñ.
Ka la ong ba da ki hajar ngut ki kynthei khamtam ki kmie ki shaniah ha ki kam iing kam sem na ka bynta ka jingim jong ki bad ki dei hok ban ioh ia ka jingithuh kaba biang, ka hok, bad ka jingshngain ha ki jaka trei jong ki. Ka la bynrap ruh ba ki nongtrei iing kim dei ban shah pynduh ia ki jingmyntoi bad jingiada kiba ioh da kiwei pat ki jait nongtrei.
Nalor kata ka kong Nongkhlaw ka la pynpaw ruh ia ka jingsngewkhia halor ki case jong ka jingshah lehbeiñ ki nongtrei iing briew ki iakynduh. Haba kdew ia ka jingjia kaba dang shen, ka la kyntu ia ki briew ba kin wan shakhmat bad kren pyrshah ia kano kano ka jingshah lehbeiñ ne shah ibeiñ.
Ka AMDWU ka la iai bteng ban kyntu ia ka sorkar ban thaw kyrpang ia ka Welfare Board na ka bynta ki nongtrei iing. Katkum ka jingong jong ka Synjuk, ka jingthaw ia kum kane ka board kan ai ka jingshngain kaba kham khraw bad kan pynthikna ba ki nongtrei iing kin ioh ia ki jingmyntoi bad ki hok kiba iadei bad kiwei pat ki nongtrei.
Ka la pyntip ba bun ki nongtrei ïing khamtam ki kynthei ki duna ka jingnang jingstad, hynrei ka Synjuk ka la trei ban pynïatylli ïa ki bad ban ïasaid na ka bynta ka hok jong ki. Ka la kyrpad ia ki nongtrei iing ha kylleng ka jylla ba kin pynrung kyrteng ialade ha ka Synjuk ban ioh jingkyrshan bad ban iashim bynta ha ki prokram pynsngewthuh ba la pynlong da ka seng.
Halor ka jingsiew bai bylla, ka Synjuk ka la dawa ba ki nongpyntreikam ki dei ban siew duna eh ₹600 shisngi sha ki nongtrei iing kiba trei na ka bynta ka kam kaba pura. Na ka bynta ki nongtrei iing kiba shipor, ka Synjuk ka la dawa ia ka bainong kaba ₹3,000 shibnai na ka bynta kito kiba trei shi kynta shisngi.
Ka AMDWU ka la pynpaw biang ba dei ban ithuh ia ki nongtrei ïing kum ka bynta kaba kongsan jong ka bor trei bad ban ai ia ka bainong kaba hok, ka jingshngaiñ, bad ka burom.