Ha ka 27 tarik Nailar 2026, ka seng (MCTODA), ryngkat bad ki nongniah trok ki kompeni cement, ki la iakynduh ia u Deputy Commissioner jong ka East Jaintia Hills District bad ia u Superintendent of Police ban iakren ia ki jingeh kiba la slem bha kiba ki nongniah trok ki iakynduh.
Ha kane ka jingïalang la ïadonlang da u President ka MCTODA ki nongialam na Jaiñtia Hills unit MCTODA, katto katne ngut ki nongñiah trok, bad ki heh District.
Ki don ki nongñiah kali kiba la ïalum ha ophis jong u Deputy Commissioner katba kiwei pat ki ap ha Kongong ïa ka jingmih na ka jingïakren.
Haba ïakren bad ki lad pathai khubor, u Moslander Marngar, President ka MCTODA, u la ïathuh ba ki transporter bad ki nongmihkhmat na ka Star Cement ki la wan ban ïashim bynta ha kane ka jingïalang, kaba la pynïaid da u Deputy Commissioner. Ha kane ka sngi la donlang ruh u Superintendent of Police, u Additional Superintendent of Police, u DTO, bad kiwei kiwei ki heh ka District. Ki heh jong ka District ki la ong ia ki transporter ba ki dei ban siew ia ki nongniah trok ia ka tulop jong ki, bad ba ki nongniah trok ki dei ban pdiang ia ka tulop ba la iakut. La bthah ia ki transporter ba kim dei ban pynshitom ia ki nongniah trok. Ki heh sorkar ki la ong ba ka jingsiew na ka bynta ka bam ka dei ban pynbiang ïa ki jingdawa jong ki nongñiah trok, namar ki nongñiah trok kim sngewhun ïa ka bai leit bai wan bad ka bai bam. U Deputy Commissioner u la bthah ïa ki transporter ba kin pynbeit ïa ka bai bam bad bai leit jingleit.
Kiba bun ki transporter ki la ju kyrpad ia ki nongniah trok ban niah ia ki trok khlem ki nongiarap. Uwei u ophisar u la iathuh ba ka jingduna ki nongiarap ka la wanrah shibun ki jingmynsaw ia ki nongniah trok bad ia kiwei pat ki nongpyndonkam surok. La iathuh ba ka Star Cement bad katto katne kiwei pat ki karkhana, kim don polisi satia ban pynbiang ia ki nongniah kali. Ki heh jong ka District ki la ong ia ki transporter ba kin ailad ia ki nongniah trok, namar ba ka long kaba eh ban niah ia ki trok kiba jrong khlem ki nongiarap.
Ka jingmih kaba seisoh na ka jingiakren ka long ka rai ba ki nongniah kali ki dei ban don ia ki jingthoh soskular. Mynta ki nongñiah trok ki shah thung bad shah beh kam katkum ka jingkwah jong ka kompeni, kaba pynlong ïa ki jingïakhih ba ju jia ar ne lai sien ha ka shisnem. Haba mih ki jingialeh, bunsien ym ju don ki soskular ba la thoh ban pynbeit ia ki. Naduh mynta ka sngi, ki nongniah trok ki dei ban ioh ia ki jingiateh ne ki shithi thung kam kiba batai ia ka tulop, ki kyndon, bad ki jinglong jingman jong ka kam.
Ym shym la shah ïa baroh ki nongñiah trok ban rung shapoh ka ophis jong u Deputy Commissioner, kumta ki la ïalum lang ha Kongong ha kaba ki nongïalam ki la ïathuh lyngkot ïa ki shaphang ka jingïalang. Kumba 600–700 ngut ki nongñiah trok ki la don lang. Ki don ki nongñiah trok kiba la pdiang ïa ki rai ba la shim mynta ka sngi, katba kiwei pat ki nongniah trok jong ki transporter ki bapher bapher kim shym la pdiang.
U Marngar u la ong ba ki nongñiah trok kim dei ban sngew lyngngoh lada ka kompeni ka pynphai biang ïa ki jingïateh mynta ka sngi hadien. Khatduh eh, ki nongñiah trok kin rai la kin pdiang ne em ïa ki jingmih jong ka jingïalang. U la kyntu ia ki nongniah kali ba kin long kiba iatylli bad kiba khlain, namar ba ka kompeni ka la pyni ia ka jingpyrshah kaba jur ia ki jingdawa bad kan nym pdiang bad pyrshang ban sngap jar jar.
