Ki dkhot ka KSU Sengkmie ha ryngkat bad ki dkhot ka Ksu Jaiaw ki lah ioh ban bat ia u khar Bangla ba thmu ban wan trei sha kane ka jylla.
Hadien ba ka Seng ka lah tohkit bniah la iathuh ba une u bar jylla u wan rung shane sha jylla da ka jingthmu ban wad bylla.
Ka Seng ka la pyntip noh sha ki Pulit bad ki Pulit ka Lumdiengjri ki la wan ban shimti noh ia une u khar Bangla.
Haba iakren bad u Organising Secretary ka KSU Sengkmie u Samla Cleen Star Shabong u la pyntip katkum ka jingioh jingtip na ki dkhot ka KSU Jaiaw la iathuh ba une u khar bangla ba ioh bat la iathuh ba u thmu ban wan wad bylla sha kane ka jylla ha ryngkat bad kiwei ki khar Bangla hynrei ki la lait phet noh bad ka KSU ka la ioh ban bat noh ia uwei u Khar Bangla uba khlem kot khlem sla bad da kaba ioh rung tuh na ki thain Border da ka jingiarap ki dallal Khasi.
Shuh shuh u la iathuh ba ha ka jingtohkit ka Seng la iathuh ba une u khar Bangla u la siew da ka dor kaba T.3000 tyngka sha ki Dalal Khasi ban ioh rung sha kane ka jylla bad ki dang don kiwei ki khar Bangladesh kiba wan rung beaiñ sha kane ka jylla bad ki spah ngut lah iathuh u Khar Bangla uba ka KSU ka la ioh ban bat ha Jaiaw.
Ka Seng ka buh jingkylli ruh ia ka Sorkar haba ka Seng ka dawa ia ka ILP hynrei ka Sorkar ka wanrah da ki aiñ iak jakor kum ka CAA CAB ha ki snem ba la dep bad ka Seng ka buh jingkylli ia ka Sorkar kan leh aiu ban khanglad ia ki khar Bangla kiba wan rung tuh shiteng miet shiteng synnia sha kane ka jylla.
Khatduh na ka liang u Samla Cleen Star Shabong u la ong ba ka KSU ka maham tyngeh ia ki dalal Khasi kiba pynrung tuh ia ki khar Bangladesh sha kane ka jylla bad lada ka seng ka lap kan sa leh ia kaba donkam.
