U myntri jong ka sorkar jylla u bah Sanbor Shullai ba dei peit ïa ka tnad Art and Culture bad kiwei de mynta ka sngi 17 tarik u Jylliew kaba dei ka seiñ kaba ar ula wan hiar biang sha nongbah Jowai, ban leit jurip da la ki jong ki khmat halor ka jinglong jingman jong ka District Library Cum Auditorium Hall kaba don ha Mynthong Jowai.
Kane ka jingleit jurip jong u Myntri ka long hadien ba ka Jaiñtia Student Union (JSU) Central Body kala dep ban aiti ïa ka dorkhas ha ki snem ba la dep halor jingsniew shaba palat jong katei ka Auditorium bad kam long shuh kaba shngaiñ ban pyndonkam bad mynta la dawa ban shna noh da kaba thymmai.
Kum ban shuh pynkynmaw ha ka 13 tarik u Jylliew, 2022 u bah Sanbor Shullai uba dei hi u Myntri ha katei ka snem ula wan jurip ïa katei ka Auditorium bad la lap shisha ïa ka jinglong jingman jong katei ka Auditorium kaba la duna shaba palat, hynrei ïa kane ka Auditorium la sdang ban maramot ïa ka bad na ka liang myntri ula ïathuh ba kam long shuh kaba biang tang ban maramot ïa kane ka Building ba rim namar ka jingshong synjor, hynrei la donkam ban shna noh da kaba thymmai ka Building kaba don haduh 6 mala.
La pynkymmaw ba ïa kane ka Auditorium la tei ïa ka naduh ka snem 1987, U Myntri ula kular ban shim khia ïa kane ka kam da kaba wanrah noh ïa ka DPR na ka bynta ban phah noh sha ka sorkar khnang ba kan ïoh leh ïa kaba donkam.
U President ka JSU Sengkmie ma Jersom Shylla haka jingkren sha ki lad pathai khubor ula ong ka seng kala dawa ban shna thymmai noh ïa kane ka Auditorium da kaba ai nam ïaka haka kyrteng u (L) Prof. Barrister Pakem District Library.
Ula ong ka jingdawa ba kyrkieh mynta ka long la donkam ban pynpra ïa ka rim bad tei noh da kaba thymmai kumba long ha Garo bad ha Shillong kyrmen ba ha Jowai ruh kan urlong noh shen.
Ha kaba ïadei bad ka jingtei ïa u mot u Kiang Nangbah ha ka jaka ka MTC kaba don ha lad Kiang Nangbah College (Lad Nartiang) bad mynta hi ka sngi Balang kala don ka Joint Inspection ha ryngkat ki ar ngut ki Myntri sorkar naduh u bah Sanbor Shullai bad u ma Wailadmiki Shylla uba dei ruh u MLA ka 2-Jowai bad la khmih lynti ba ka kam kan urlong noh shen.
Ka seng kala aiti ruh da ka jingthoh sha baroh ar ki myntri ha kaba ïadei bad ka Amphitheatre kaba don ha Salini Colony Mihmyntdu Jowai kaba la plie paidbah naduh u snem 2017 hynrei haduh mynta kam shem la pyntreikam satia bad kiba bun ki bynta jong ka kila julor lut naduh ki jingkhang, ka bor ding electric bad kiwei de.