Ki ar tylli ki sengbhalang napoh East Jaintia Hills District, kata ka FKJGP-Khliehriat Circle bad ka MPUF-East Jaintia Hills kila buh ka jingkyrpad bad jingkyntu ia kino kino ki kynhun ba kim dei ban pynlong ia ki prokram jingiakhih jong ki ha ka Sngi long iew (Pyngkat) ha Khliehriat East Jaintia namar ba ki jingiakhih kum ki jingshong kyllain myngor ha surok NH-6 ka ktah iaka kamai kajih ki paidbah naduh ki Taxi kamai, ki Tourist kamai bad kiba iadie iapet.
Lada ki jingiakhin kan ktah jur ia ki nongshong shnong namar ha kum kine ki por ba hiran ka long ka man, lada ki paidbah ki duh ban kamai laitluid haka Sngi iew kaba dei ka sngi ba khambha ka kamai kajih kan long ka jingduh nong kaba khraw bha ia ki bad ka ktah ia ka leit ka wan u paidbah paidlang ruh kumjuh.
Na ka liang ki arseng ki kyrpad ia ki bor ka District Administration ba kim dei ban ai kano kano ka permission ban pynlong kino kino ki jingiakhih kiba ktah ia ka iaid ka ieng ki paidbah bad ka iadie iathied haka por ba long ka sngi iew Pyngkat.
Sa shisien ki arseng kila buh ruh ka jingkyrpad ba kino kino ki kynhun kiba iakhih haba iadei bad u dewiong ki dei iakhih naduh ka mynsien bad kim dei ban shet kylla ia u paidbah lane kim dei ban pyrkhat ia ka jingmytoi shimet namarba ka kam dewiong dei ka kam iap kam im ki paidbah. Ka seng ka hap ban ong kumta namarba naduh u snem 2014 la khang ia u dewiong hynrei ym don dak ba ki paidbah kin ioh sdang biang ia u dewiong ngi kut tang ha ki jingshah pynbiej, pynkut ka kyrwoh na u bah Michal Chyrmang President FKJGP-Khliehriat Circle bad u bah Kyrshan Blah President MPUF-East Jaintia Hills.