Ka Jaintia Coal Miners Supplier & Worker Association (JCOMSWA) ha ka 17 tarik Jylliew 2026 ki la wan sha Secretariat ban iakren hadien ba u Chief Secretary ka Sorkar ka jylla u Dr. Shakil P Ahmed u la khot iakren ia ka kynhun kaba pynlong ia ka jingiakhih shong shah thngan jong u President ka Kynhun JCOMSWA u bah Marshall SB Biam, na ka bynta ban dawa plie biang ia ka jingtih Dewïong ha ka jylla.
Haba kren sha ki lad pathai khubor hadien ba la wai ka jingialang u Bah Over Come Dkhar, Information Secretary ka JCOMSWA u la ong ba ka Sorkar ka la pdiang ban thaw da ka komiti hapdeng ka ophis jong DC East Jaintia Hills bad ki nongialam ka kynhun JCOMSWA haba iadei bad ka Small Scale Mining Policy.
Nalor kata u la pynpaw ba ka Sorkar kan pynsangeh shwa shipor ia u Dewïong ba poi na bar haduh ban da poi u Justice Retired BP Katekey haduh 29 tarik Jylliew 2026.
Shuh shuh u la ong ba ka Sorkar ka pynpaw ba ka don ka skhim na ka bynta ki paidbah kiba la shah ktah na u Dewïong ba la tip kum Skhim (MEPRF) Meghalaya Environment Protection & Restoration Fund hapoh ka ophis Deputy Commissioner East Jaintia Hills bad u la ong ruh ba ka Sorkar kan iakren bad ka Jaintia Hills Autonomous District Council JHADC ban shna ia ki aiñ haba iadei bad u marpoh Khyndew.
Khatduh u bah Over come Dkhar, la ong ba na ka liang ka Association kam pat hun ia kane ka jingialang mynta ka sngi bad kan iai bteng beit ia ka jingiakhih shah thngan bad u President ka JCOMSWA u dang don hapdeng ka jingshah sumar ha hospital bad ka kynhun kan bteng beit ia kane ka jingiakhih shong shah thngan bad u la ong ba ka Seng kan sa shong jingialang biang haduh ban da wan u Retired Justice BP Katekey bad ka shim ia ka rai haba iadei bad kane ka jingdawa ka Seng ban pyllait biang ia ka jingtih Dewïong ha ka jylla.
