Ka East Jaintia National Council EJNC-Khliehmyntriang unit hapoh ka jingialam u president ma Lektor S Dkhar bad ki dkhot jong ka, ki la iakynduh ia u Executive Engineer ka MeECL halor ka nongrim ban dawa ban ker sawdong ia u transformer u ba don hapoh ka shnong Khliehmyntriang. Une u transformer u don hapdeng ki surok shnong bad footpath bad teng teng u ne u transformer u ju meh ding ruh.
U bah Lektor u la ong kane ka buh jingma shibun ia ki paidbah nongshong shnong bad khamtam ia ki khyllung khynnah kiba iaid lynti man la ka sngi na jan une u transformer bad u la ong ruh ba um kwah ban don kano kano ka jingjia ba sngewsih.
Na ka liang u Executive Engineer jong ka MeECL u ma H Iakai u la kular ban pynioh ia kane ka jingdawa jong ka Seng khnang ban shngaiñ u paidbah nongshong shnong ha ka juh ka por ruh u president ka EJNC u ma Lektor Dkhar u la kyntu ruh ia u Executive Engineer ba ki dei ban kylliang thymmai ia baroh ki Post bording elektrik kiba la kdiah bad kiba la bam sarang. U ma Iakai u la ong ba ki la dep ban kylliang ia ar tylli kita ki Post bording ha ka sngi Monday ba la lah bad ia kiwei pat kiba dang sah yn sa kylliang pat ha kine ki sngi ban wan.