Ka Composite Regional Centre for Skill Development, Rehabilitation and Empowerment of Persons with Disabilities (CRC), Shillong mynta ka sngi kala pynlong ia ka prokram ban sam ia ki tiar ai jinghikai ne ki TLM Kit sha ki briew kiba don jingduna bad ia kane ka prokram la pynlong ha Community Hall jong ka shnong Khliehriat East, ha kaba u Deputy Commissioner jong ka East Jaintia u Abhilash Baranwal, IAS ula long u kongsan.
Haba kren ha ka jingialang u DC ula ong ba ia ka imlang sahlang la bishar ia ka ha kano ka rukom ba ka shakri na ka bynta kito ki para briew kiba don ha ki jingduna. Namar kino kino kiba don ha ki jingduna la ha kino kino ki bynta jong ka jingim jong ki, ki donkan ban ioh ka jingkyrshan khnang ba kin lah ban kiew ne kynjoh sha ka thong jong ki. Ula iaroh ia ka District Social Welfare Officer bad ia ka Composite Regional Centre (CRC) Shillong kiba la shim khia ban pynlong ia kum kine ki prokam ai jingiarap sha kiba donkam shisha ia ki. U Kyntun ba kin dang iai bteng ia kane ka kam khnang ba kan long ka jingmyntoi ia ki briew kiba don jingduna.
Na ka liang jong u Ram Sahani u Officer Incharge ka CRC Shillong ula ai ka jingkren lyngkot halor ka jingshakri ba la ai da kane ka Centre kiba kynthup ia ka Special Education Department, Clinical Psychology Department Physiotherapy Department, Training and Mobility, Counseling, Vocational training bad kiwei kiwei ki bynta. U la kyntu ia kino kino kiba don jingduna ki lah ban wan sha kane ka Centre bad rejister ialade khnang ba kin ioh ia ki jingshakri kiba khlem da hap ban siew.
Ia kine ki tiar Teaching Learning Materials (TLM) la sam sha ki nongioh bynta da u DC, Abhilash Baranwal, ka kong R. Passah DSWO bad u Ram Shakal Sahani.
Ha kane ka jingialang la don lang ruh u ma Kedius Rymbai Waheh Shnong ka Khliehriat East.