U President ka JCOMSWA (Jaintia Coal Owners, Miners, Suppliers & Workers Association), u bah Marshall S.B. Biam, u la kren bad ki lad pathai khubor mynta ka sngi (23/6/2026) halor ka jingpynsangeh noh ia ka jingshah thngan khlem buh por jong ki. Ha kane ka jingiakhih la dawa na ka sorkar ban ailad ia ki kam tih dewiong ha kane ka District.
Haba iakren hakhmat ka ophis u Deputy Commissioner ha Khliehriat, u Marshall S.B. Biam u la ong ba ki la pynkut noh ia ka jingiakhih namar ba ki don ki dkhot kiba lah ban shah thngan tang shi sngi ne ar sngi kiba la mad ia ki jingeh ha ka koit ka khiah ka jingkiew BP bad ka jingkiew shini namar ba bun kim pat ju shah jingit mynno mynno ruh. U la iaroh ia ka jingshlur jong ki bad ong ba ka jingshah thngan ka dei tang ka jingsdang. “Ngin sa shim ïa ki sienjam kiba kham heh”, u la maham bad bynrap ba tang hapoh khyndiat sngi kin sa mih sha surok ban ïakhun na ka bynta ka hok jong ki ha kaba ïadei bad ka jingtih dewïong ha ka District.
U la ong ba ka sorkar ka la khot ia ki dkhot jong ka Association ban iakynduh ia u Chief Secretary ka jylla Meghalaya. La thung saw ngut ki dkhot ban shna ia ka plan tih dewiong, bad la tyrwa ia ka skhim ban iarap ia ki longiing kiba shah ktah na ka jingkhang tih dewiong.
Mynta ka sngi ka seng ka la leit sha ophis jong u Deputy Commissioner ban buddien ia kata ka jingialang. U Biam u la ong ba kim shym la shong kli kti hadien ba ki la pynsangeh noh ia ka jingiakhih; ki dkhot ki la ia lum lang ban bteng ban bud ia ki mat ba la iakren ha Secretariat. Kine ki dang ap ia ka jingtip kaba kham bniah na ka ophis u DC bad kin sa pyntip sha ki lad pathai khubor hadien.
Haba jubab ïa ka jingkynthoh paidbah halor ka rai jong ki ban pynsangeh noh ïa ka jingïakhih, u Biam u la ong ba ki paidbah ki don ka hok ban ai jingmut bad un ym jubab shuh namar “ka bor ka shong ha ki paidbah.” U la kyntu ia ki nongkyrshan ba kin long kiba iaishah bad ban iai kyrshan ia ka seng, da kaba bynrap ba kin ym shong kli kti tad haduh ba kin da ioh ia ka jingmih kaba bha, wat la ki don ki jingeh.