U waheh shnong jong ka shnong Tongseng Nongkhlieh u bah Pynpoibiang Dkhar bad kiba haïing jong u Kyrshan Lamurong uba la jah rngai naduh ka 15 tarik mynta u bnai jylliew 2026 ha ba kren sha ki lad pathai khubor mynta ka sngi hadien ba ki la ujor da ka FIR ha thanat Khliehriat. La iathuh ba U Kyrshan, u don ia kawei ka kali S‐Presso kaba thymmai bha.
U bah Dkhar u la ong ba u Kyrshan u la trei bun bun snem kum u nongñiah taksi Tourist da kaba kamai na shnong sha Shillong. U la sah ha Tongseng naduh dang rit, u dei u kpa jong ki hynriew ngut ki khun, bad la tip ia u ha shnong kum u briew uba bha, uba don ka jingkitkhlieh bad uba sumar ia la ka iing ka sem. Ki nongshong shnong ki sngewkhia ia ka jingjah jong u. Ki la wad ia u la katto katne sngi bad kin dang iai bteng shuh shuh. Katkum ka jingong u Waheh Shnong, u Kyrshan um don nongshun ha katei ka shnong bad ym shym la don ki jingiakynad dang shen. U la kyntu ia ki Pulit bad ki nongmihkhmat jong ka thaiñ ban tohkit bad shimkhia ia kane ka kam.
Uwei na kiba haïing u bah Albinus Lamurong u la ïathuh ba ki bahaïing ki la tip ïa ka jingjah jong u Kyrshan ha ka janmiet jong ka 15 tarik haba ka tnga jong u ka la pyntip sha ki. U bah Albinus u la iathuh ruh ba u Kyrshan mynshwa u ju niah ia ka kali Alto 800 kum ka taksi tourist hynrei u la die noh ia ka bad thied ia ka kali thymmai ha ka 8 tarik Iaiong. Ha ka 15 tarik u mynta u bnai u khlem leit kamai sha Shillong namar ba ym don nongleit nongwan ha kata ka sngi. Haba ki bahaïing ki la pyrshang ban phone ïa u ha ka por 8:00 PM eiei, ka phone jong u ka la shah pynlip; ki la iai bteng ban phone baroh shi miet, U Albinus u la batai ia u Kyrshan ba um don kano kano ka nam kaba sniew ha ka imlang sahlang bad u la ong ba kiba ha iing kim tip balei u la jah rngai. U la kyrpad ia baroh ban iatreilang bad ban pyntip ia kino kino ki jingtip sha kiba ha iing ha sem ne sha ki pulit.