Ha ki 12 snem ka jingkhan tih, pyntrei bad die dewiong kam shym la ktah tang ia ki trai Dewiong kiba pyntrei tih bad die dewiong, hynrei ka ktah ruh ia ka iarong pisa jong ka Jaintia Hills Autonomous District Council (JHADC) ba ki challan jong ka kim iaid iew shuh bad kumjuh ka Royalti (Khajna) kaba ka juh ioh na ki Beat House bad Check Gate jong ka kam ioh shuh.
Ka jingdawa ban pynlait tih dewiong na ka National Green Tribunal (NGT) bad na ka Sorkar pdeng lah ban ong ba hapoh kine ki 12 snem kiba la leit noh, kam shym la dawa tang na ki trai Dewiong, na ki paidbah hynrei la dawa ruh na ki bor pyniaid jong ka District Council, Jaintia Hills pynban kam shym la mihsoh mihsla ei ei.
Ki nongmihkhmat MDC ka JHADC ha ki snem kiba la leitnoh bad ki MDC kiba mynta haba ki la iohi ba kane ka jingkhang tih Dewiong ka NGT ka la ktah shi katdei eh ia ka Council hapoh kine ki 12 snem ba kim lah ban iarap paidbah na ka bynta ki kam pynroi ri kum ka jingpynbha ia ki umbam umdih, ban maramot ia ki iingskul, ia ki Community Hall bad ia kiwei de ki kam pynroi ri.
Halor kine ki jingeh mynta ka sngi (24/06/2026), ha ka jingiashong Dorbar kyrpang (Special Session) da kawei ka jingmut baroh 30 ngut ki MDC ki la pass da ka rai (Resolution unanimously) ban dawa na ka sorkar India ban pyllait mardor khlem da pynslem shuh na ka bynta ka jingmyntoi jong ki paidbah bad kumjuh na ka bynta ka iarong pisa jong ka District Council.
Lah ban ong ba kane ka dei ka sien kaba nyngkong eh ba ka JHADC kan dawa beit beit na ka sorkar pdeng na ka bynta ban pyllait noh ia ka jingkhang tih dewiong.
