Ka lympung ïalehkai phutbol ki khynnah skul kaba la tip kum ka ‘District Level Inter School Subroto Mukherjee Cup Football Tournament 2026’ kaba la long mynta ka sngi 24 tarik u Jylliew ha Wahiajer Multi Sports Complex bala pynïaid da ka ophis u District Sports Officer West Jaiñtia Hills District, Jowai.
Haba phai sha ki jingïakhuh mynta ka sngi haka kyrdan Under-15 (boys) ka Jowai Govt. U/P RMSS School kala jop da 1-0 kol ïa ka Mihmyntdu Sec. School. Ka Seiñraij H/S School, Wahiajer kala jop da 1-0 kol ïa ka Nephington Laloo Memorial Secondary School. Ka Jingshai Mihngi Adventist H/S School kala jop da 4-3 kol ïa ka Sabahmuswang U/P School lyngba ka jingïashut Tie Breaker. Ka Mihmyntdu R.C Eve Sec. School kala jop da 1-0 kol ïa ka Modern Sec. School Ialong. Katba ka Marian Hill H/S School kala jop da ka Tie Breaker 4-2 kol ïa ka Lumpyrtuh H/S School.
Ha ka jingïakhun jong ka kyrdan Under-17 (boys) ka Syiem Jingsuk kala jop da 5-4 kol ïa ka Lumpyrtuh Sec. School haka jingïashut Tie Breaker. Ka Amwi H/S School Thangbuli kala jop da 10-0 kol ïa ka Kiang Nangbah Sec. School Mukhla. Ka H.K Singh Memorial Sec. School kala jop da 6-1 kol ïa ka Jingshai Mihngi Adventist. Ka Mihmyntdu R.C Eve Sec School kala jop da 2-1 kol ïa ka Achievers H/S School. Katba ka Sawlyngdoh H/S School kala jop da 6-0 kol ïa ka Govt. Boys H/S School.
