Ka Khasi Students’ Union (KSU), South West Border Circle, ka ai ka jingïaroh bad ka jingsngewnguh ïa u Executive Engineer (EE) bad ïa u Sub-Divisional Officer (SDO), Public Works Department (Roads), Khliehriat Division, kiba la shim khia kloi ïa ka jingkyrpad jong ka seng halor ka jingjulor jong ka surok Borghat–Sonapur ba dang shu dep shna namar ka jingkhyllem ki Kynroh, twa khyndew, bad ka jingbym don ki jingtei jingïada.
Dang ha ki khyndiat sngi ka KSU South West Border Circle hapoh ka jingialam u samla Andrias Talang ka la leit ban aiti ïa ka dorkhas sha u Executive Engineer PWD roads Khliehriat, bad dawa ia kitei ki mat, kumta na ka liang u Executive Engineer khlem pynslem bad da ka jingkit Khlieh ha ka 3 tarik u Naitung, 2026, la pynlong ïa ka Joint Inspection ha pdeng ka KSU South West Border Circle kaba la ïalam da u President, Bah Garnes Talang, bad u Vice President, Bah Kampher Pohthmi, bad ka tnad PWD ba mih khmat da u Executive Engineer (EE) bad u Sub-Divisional Officer (SDO), Public Works Department (Roads), Khliehriat Division. Ka jingjurip ka la sdang na Borghat bad bteng shaduh Sonapur (Sonapyrdi), ban jurip ïa baroh ki bynta jong ka surok kiba la shah ktah na ka jingtwa khyndew, ka jinhap maw bad ka jingjulor jong ka surok na ka jing ther slap ha kine ki sngi bad bun na ki bynta khamtam naduh ka Shnong Kwator shaduh wahprang bun ki jaka ba lah long thliew ha pdeng Surok.
Ha kane ka jingjurip, ki ophisar jong ka PWD ki la pynthikna ba yn pynkhuid noh ïa ki khyndew, ki maw bad kiwei ki jaboh kiba la kah ïa ka surok bad yn maramot ïa ki bynta jong ka surok kiba la julor tang shu wan ka aiom rkhiang, namar ha kane ka por slap kam long kaba biang ban pyntrei ïa kine ki kam. Ki ophisar ki la pyntip ruh ba halor ka jingshna ïa ki Side Drain, Catch Water Drain, Retaining Wall, Jingkieng bad kiwei ki jingtei jingïada, ka tnad ka la dep pynkhreh ïa ki proposal bad la dep phah sha ka Sorkar ban ïoh ïa ka jingmynjur (Sanction) bad ka jingïoh pisa ban pyntreikam ïa kine ki projek. Ynda la ïoh ïa ka jingmynjur na ka Sorkar, yn sdang noh ïa ki kam shna bad jingïada ha ki bynta kiba donkam.
Ka KSU South West Border Circle ka sngewkmen ïa ka jingshimkhia bad ka jingïatreilang jong ki ophisar ka PWD kiba la shim khia kloi ïa ka jingeh jong ki paidbah. Ka seng ka ngeit skhem ba ka jingpyntrei ïa kine ki kam jingïada kan ïarap ban pynneh ïa ka surok Borghat–Sonapur, kaba dei ka lynti kaba kongsan tam bad kaba la long ka jingkyrkhu ïa ki shnong khappud jong ka East Jaintia Hills District.
Ha kajuh ka por, ka Khasi Students’ Union (KSU), South West Border Circle ka kyrpad ruh ïa ka MLA ka thaiñ, Kong Santa Mary Shylla, ba kan nang bteng ban shimkhia bad ban buddien ïa kane ka mat paidbah ha ka Sorkar khnang ba ki kam ba la tyrwa, kynthup ïa ka jingshna ïa ki Side Drain, Catch Water Drain, Retaining Wall, Jingkieng bad kiwei ki jingtei jingïada, kin ïoh ïa ka jingmynjur kloi katba lah. Ka Seng ka ai ruh ka jingsngewnguh kaba kyrpang ïa ka Kong Santa Mary Shylla, kaba la ju sngap bad shimkhia ïa ka sur jong ki paidbah kiba shong ha ki thaiñ khappud. Kumba ka la ju ïarap bad buddien ïa bun ki mat kiba ktah ïa ki shnong khappud mynshwa, ka Seng ka kyrmen skhem ba kan dang bteng ban ïeng ryngkat bad ki paidbah bad ban buddien ïa kane ka kam haduh ba yn pyndep ïa baroh ki jingtei kiba donkam.
Ka KSU South West Border Circle kan nang bteng ban buddien ïa kane ka kam bad ban peitngor ba baroh ki jingiarap ba la ai da ka tnad PWD kin long kiba urlong ha ka por kaba biang, khnang ba ki paidbah jong ki shnong khappud kin ïoh ïa ka surok kaba skhem, kaba shngaiñ bad kaba neh slem.
