Ka Meghalaya Editors’ and Publishers’ Association (MEPA) kaba dei ka synjuk jong baroh ki lad pathai khubor ha Meghalaya ka la pynlong ia ka jingialang ba shisien shi snem jong ka ha Shillong Club ha ka 12 tarik u Lber (March), 2022.
Ha kane ka jingialang la wan shim bynta da ki editor, ki nongpynmih bad ki trai jong ki kotkhubor, ki magazine, ki news channels bad ki online media na ka jylla.
Ka jingialang ka la iakren sani halor kiba bun ki mat kiba iadei bad ki lad pathai khubor ha ka jylla, ki jingeh kiba ki lad pathai khubor ki iakynduh ha kaba iadei bad ki advertisement jong ka sorkar bad ruh ki kam kiba iadei bad ka bha ka miat jong ki nongpathai khubor.
Ka jingialang ka la shim ruh katto katne ki rai kiba long ki mat jingdawa ban leit pynsngew ha khmat jong ka sorkar na ka bynta ka jingbha jingmiat jong ki trai bad ki nongthoh khubor hapoh ka jylla.
Ka wei na ki mat mat jingdawa ki ba ka MEPA kala shim ha kane ka jingialang ka long ka jingpyntreikam noh ia ka New Media Policy, khnang ban wanrah ia ka jingtreikam ba iaid beit iaid ryntih ha ki kam pathai khubor. Nalor kane ki don ruh sa kiwei pat ki jingdawa kiba kynthup ia ka jingeh kaba ki online media ki ia kynduh ha kaba iadei bad ka jingpynioh ia ki advertisement bad ka jingsiew ia ki bills, ka jingkyntu ia ka sorkar ban pynlong noh ia ka DIPR kum kawei na ki Department kiba kongsan, da kaba pynbiang ia baroh jingdonkam jong katei ka Department. Ka jingdawa ban pynheh shuh shuh ia ka Journalist Welfare Fund bad ban pynthikna ba kane ka jingiarap siew ia ki bai Hospital kam dei ban long sha shisien siew. Kaba kongsan shuh shuh ki mat jingdawa ka long ban pan ka jingiada ia baroh ki nongthoh khubor kiba don hapoh ka jylla.
Ia baroh kine ki jingdawa ka MEPA kan sa leit ban aiti sha ka sorkar jylla hapoh kine ki khyndiat sngi.
