Mynta ka dei ka sngi ba ar ‘Mulong’ jong ka lehñiam shad Behdieñkhlam ka Seiñraij Jowai ha kaba na ka liang ki ‘Kmai Raij’ kila leit rah ïa ki ‘Deiñkhlam’ na khlaw ban leit pynpoi ïa ki ha Iawmusiang, Jowai.
Naduh ka por mynstep u Dolloi, u Langdoh bad ki Waheh Wasan kila sdang ïa ka nguh ka dem “Kñia Aitnar’ ha ka Syiem Aitnar bad ïa ki jingpynlut pynsep baroh la bei da u Dolloi ka Elaka Jowai, la ïathuh ruh ba ka jingpyndep ïa kane ka ‘Kñia Aitnar’ kan long ka jingkyrkhu ïa baroh ki khun ki hajar.
Ha kane ka juh ka sngi baroh ki Kmai Raij kila mih na Mynkoi Pyrdi ban pynhiar ïa ka bom ka Bhuri, ka tangmuri ha Biar ka Blai bad nangne kila leit mih sha Iawmusiang ban leit rah ïa ki Deiñkhlam na khlaw.
Katba ha ka por janmiet ki Kmai Raij na baroh ki dong kynthup ïa ka Panaliar, Dulong, Lumpyrdi ïongpiah, Lumïongkjam, Tpep-Pale bad Lumkyrwiang kila leit pynshong pynthiah ïa kitei ki Deiñkhlam ha ki jaka ba la pynkhreh ha Iawmusiang, katba ki Khon Raij (Chilliangraij) hashwa ban pynpoi ïa ka ‘Khnong Blai’ haka jaka buh ha Loom Sooïung, New Hills Jowai, kila leit thew shwa ïa ka jingheh ki Deiñkhlam baroh bad kim dei ban heh ïa ka Khnong Blai, hadien bala dep buh ïa ka Khnong Blai nangne baroh ki khun ka Kmai Raij kila leit phai na kajuh ka lynti.
La ïathuh mynta ka sngi Mulong “la pynmih ïa ki Deiñkhlam jong u lum pdeiñ ka bei pun ‘Tein’ na Dulong, ka bei pun ‘Wet’ na Panaliar, ka bei pun ‘Doh’ na Lumïongkjam bad na u lum Pdeiñ ka Lumpyrdi, ka Lumkyrwiang bad Tpep-Pale kiba long ki khun ka kmai Raij, haka por janmiet la leit rah kumjuh ïa ka ‘Khnong Blai’ jong ka bei pun ‘Bon’ na u lum pdeiñ ka Khon Raij”.
Lashai kaba dei ka sngi ‘Musiang’ ki Kmai Raij kin leit shim ïa kitei ki Deiñkhlam ban leit pynïeng sha manla ki dong, katba ki Khun Raij kin leit rah ïa ka ‘Symbood Khnong’ ban pynïeng ha khlieh Chnong (Chilliang Raij) bad ïa ka ‘Khnong Blai’ kin pynpoi hapoh Sawiar, khnang ba u Dalloi un ai pyrnah Khnong Blai ha u Kñi Nikhla ban leh ïa ka ñiam ka rukom.
