Ki bor pyniaid shnong jong ka Tongseng Nongkhlieh lyngba u Waheh Shnong jong ka shnong Tongseng Nongkhlieh ryngkat ki bahaïing hasem jong u bah (L) Kyrshan Lamurong, uba la shah pynïap bad bret ïa ka met jong u ha ka thliew dewiong ba la shu iehnoh ha ka shnong Rymbai (Dongkon) ha East Jaiñtia Hills ha ka 6 tarik mynta u bnai ki la kren sha ki lad pathai khubor ban ai ia ka jingsngew nguh sha ki bor Pulit bad kiwei pat na ka bynta ka jingpyrshang jong ki ha ka por ban wad ia u (L) Kyrshan, uba la jah rngai naduh ka 15 tarik u bnai jylliew 2026, ha kaba la iohi khatduh ia u ryngkat bad ka Maruti S‐Presso thymmai jong u.
U Waheh Shnong u la iathuh ha ki lad pathai khubor ba ynda ki la tip ba ki Pulit ki la lap ksai ia katei ka met iap, ki la duh kyntien bad ki la pynrem jur ia katei ka jingpyniap bein. Baroh ar tylli ki jait kur katta ka jait kur Dkhar bad ka jait kur Lamurong ki la pynpaw ia ka jingpynrem kaba jur ia katei ka jingshah pyniap. U Waheh Shnong u la ai ka jingkhublei ïa ki briew ha kylleng ka jylla, khamtam kito kiba na East Jaiñtia Hills District, ki nongmihkhmat na ka thaiñ, kiwei kiwei ki nongsynshar shnong bad ki Pulit, kiba la trei shitom khlem shongthait.
U la dawa ba ia kiba donkti dei ban pynshitom katkum ka aiñ bad kyntu ruh ia ki bor ba dei peit ba kim dei ban ai jamin da kaba ong ba ki donkti ki dei ban pynlut ia ka jingim jong ki hapoh phatok. U la ong ba u kyrmen ba yn sa pynurlong ia ka hok, khamtam eh na ka bynta ki hynriew ngut ki khun jong u Kyrshan bad ka kmie jong ki.
Kiba ha iing ha sem u (L) Kyrshan ki la ai khublei ki ia ki pulit ka Khliehriat, ki MLA, ki MDC, ki VDP, ki kynhun ka SDRF bad ki tnat postmortem kiba trei shitom. Ki la pan map ruh na ki Pulit lada don kino kino ki jingkren kiba eh ha ka jingtalasi ban lap ksai.
Kiwei pat kiba haïing ki ïathuh ba ka kur Lamurong bad ka kur Dkhar ki la wad miet la bad sngi hadien ba u Kyrshan u la jah rngai. Ki la kyntu biang ia ki bor ba dei peit ban pynshitom ia kiba donkti ban pyniap ia u Kyrshan.