Ka Jaiñtia Coal Miners & Dealers Association (JCMDA) mynta ka sngi ka la pynlong ïa ka jingïalang ha Khliehriat West Community Hall ha East Jaiñtia Hills District ban ïakren halor ka kam tih dewïong kaba dang ïaid shakhmat ha ka phang pdeng “U dewiong u long ka pliang ja jong ngi, Kawei ka sur, kawei ka jingmut, kawei ka lynti, da ka jingiatylli ngin jop.”
Ha kane ka jingïalang la ïadon lang ki MLA ka thaiñ u bah Kyrmen Shylla (Khliehriat Konstitwensi) bad ka kong Santa Mary Shylla (Sutnga Saipung Konstitwensi), katto katne ngut ki MDC ka JHADC, ki dkhot nongkitkam ka JCMDA, u president ka JNC, ki nongmihkhmat jong ki katto katne ki seng trei mon sngewbha, ki riew paidbah kiba shaniah ha ka kam tih dewiong, bad ki trai jong ki kam khaii rit kiba trei dewiong.
Ka kong Santa Mary Shylla, haba ai jingkren ha kane ka jingialang, ka la batai ia ka jingiakren jong ka dang shen bad u myntri dewiong ka sorkar pdeng u Shri G. Kishan Reddy. Ka la ai khublei ïa u Myntri Rangbah ba donburom jong ka jylla Meghalaya u Shri Conrad K Sangma uba la pynsuk ïa ka jingïakynduh bad u Myntri ka sorkar pdeng. Ka la ong ba ka la pynpaw ia ki jingeh ba ki briew jong ka East Jaintia Hills District ki iakynduh, bad ha ka 7 tarik ki la don katto katne ki jingmih kiba bha na katei ka jingialang.
Ka la ong ba ka jingtih dewiong da ka ‘Open Cast Mining’ kam long kaba lah ban leh ha ka distrik namar ba ki dewiong ki don tang 3–6 phut, bad ki rukom tih dewiong da ka ‘Open Cast Mining’ kan pynsniew ia ka mariang. Ka la bynrap ba ka dang iatreilang bad u MLA ka Khliehriat ban wad ia ka lad ban sdang biang ia ki kam tih dewiong ha ka distrik, ym ha kajuh ka rukom kumba long mynshuwa, hynrei lyngba ki rukom treikam kiba biang. Ka la kam ba ki briew ki lah ban kynnoh ia ki MLA ba ki ai jingkular thylli, hynrei ka la ban jur ba katei ka kam ka donkam ban bud ia kiba bun ki rukom treikam katkum ki kyndon.
U MLA ka Khliehriat u bah Kyrmen Shylla u la ong ba ka district ka dei ban pyndonkam ia ki jingdon jingem jong ka hynrei ban pynbha ruh ia kino kino ki jingpynjot ia ka mariang da kaba thung dieng, pynkhuid ia ki um, bad kiwei kiwei. U la kyntu ia ka jingiatylli bad ka jingiatreilang, da kaba ong ba ka jingsngewsih hapdeng ki briew ka long ka jingkhanglad ia ka jingkiew shaphrang. U bah Shylla u la iada ruh ia u president ka JCMDA, da kaba ong ba u long uba biang ha ka liang ka pisa tyngka bad u ieng na ka bynta ki longiing kiba duk kiba shaniah ha ka jingtih dewiong. U la kdew ba ha kine ki lai bnai ba la dep ka JCMDA ka la trei shitom ban ïakynduh ïa ki heh sorkar, kynthup ïa u Myntri Rangbah bad u symbud Myntri Rangbah ka Jylla Meghalaya, ban kyrpad ban bishar bniah ïa ka jingkhang tih dewiong bad ban wad ïa ki lad ki lynti ban weng noh ïa ka.
