Ki nongialam ka party ka Trinamol Congress ha kane ka sngi saitjain 12.03.2022, ka la ioh ban pynkha ne pynskhem ia ka Unit treikam ka jong ka ha 4- Mookaiaw Constituency, ha ka jingialang kaba la long ha Community Hall ka shnonng Laskein West Jaintia Hills District, ha kane ka sngi la wan ban pynskhem ia ki nongkit kam kane ka Unit da u bah Charles Pyngrope President TMC jong ka jylla, ha ka jingiadonlang ruh u bah H.M Shangpliang, bah James Lyngdoh Vice President, ma Shitlang Pale bad kiwei de.
Hashwa ban pynskhem ia ki nongkit kam kane ka Unit la don ka jingialang kaba lyngkot kaba la pyniaid da u ma Nicholas Suchiang, ha kaba la ioh ia ki jingkren na u ma Lasting Suchiang uba dei uwei u rangbah na ka shnong Laskein u ban sa iakhun na kane ka Party ha kane ka Election MLA ka ban wan na kane ka 4- Mookaiaw Constituency, na ka liang u ma Lastian bad kiwei kila pdiang burom ruh ia ki nongkitkam jong ka TMC ia ka jingkloi jong ki ban wan sha kane ka Constitency ha kaban pynskhem ia ki nongkitkam jong ka Unit hangne.
Na ka liang u bah Pyngrope u pynpaw ka jingsngekmen kaba khraw ha kum kane ka sngi sah kynmaw ia kane ka Party TMC ban wan pynskhem ia ki nongkitkam hangne namar kane ka dei ka shnat trei kam kaba nyngkong eh ba ka TMC ka la ioh ban pynkha hapoh ka West Jainia Hills District bad u ngeit skhem ba kumba ka Symbol jong kane ka Party kaba dei da ki syntiew, ba kin phuh ki phieng hapoh kane ka District lyngba ka jingtrei shitom jong ki nongkit kam, kumjuh ruh u ai ka jingiaroh bad kitbok ia u ma Lasting Suchiang u rangbah u ban sa long u kyrtong na kane ka Party na ka 4-Mookaiaw Constituency.
U la ong ba kane ka party kam dei kum kiwei pat ki party hynrei kane ka party ka dei kaba kdup lang ia baroh ki jait bynriew ne niam khlem da leh shiliang, kumjuh ruh ka nongialam ba ha khlieh duh jong ka TMC ka Mamata Banerjee ka dei ka briew kaba bha bad kaba don ka mynsiem ban trei na ka bynta kiba duk ba rangli khlem da don kata ka jingleh shiliang.
U bah Himalaya haba kren u la ong ba dei tang kane ka Party kaba ieng ban buh ki jingkylli ha ka iing dorbar ka jylla halor ka jingeh jong ki paidbah ka sor Jowai ha ka jingiadei bad ka jingsah kut ki ñiut ha nongbah Jowai. Sa kawei ruh u ong ba TMC ka la wan rah ruh ia ka jingkylli hakhmat u myntri ba dei peit ia ka tnat pule puthi halor ka jingbymbiang ki iing ne building skul hapoh jylla, namar um kwah ba ki ïing skul ki long kiba jot ba pei, kumjuh ruh ka Party TMC ka la wan ruh ia ka issue halor ka jingeh ki nongrep bad kiwei de ki jingeh jong ki baduk.
Ki nongkit kam kane ka Block ha kane ka Constituency ki kynthup ia u President ma Morningstar Suchiang, ki Vice President ma Wanri Sumer, ma Kotidimus Syngkon bad ma Roming Suchiang, General Secretary ma Wanbait Suchiang ryngkat bad hynriew ki Joit Secetary bad kumba shiphew ngut ki EC member.
