Ka Jaiñtia National Council (JNC) Western Zone hopoh ka jingïalam u President jong ka, u Hamehi Bamon ryngkat ki dkhot mynta ka sngi ki la leit khang khyrdep ïa ka ophis jong ka Airtel kaba don ha Ladthalaboh, Jowai. Ïa kane ka sienjam la shim kum ka jingpynrem ïa ka jingbym lah jong ka kompeni ban pyndep ïa ka jingkular jong ka, kaba la dep ban pynbna ïa ka jingpynïasoh network ha ka thaiñ.
Ka JNC ka la pynkynmaw ba ha ka 28 tarik Jymmang, ka seng ka la pynlong ïa ka jingïalang bad ki heh ophisar jong ka Airtel ban weng ïa ka jingeh kaba dang ïai bteng na ka jingbym biang ka network, khamtam eh ha Woodland Hospital ha Sabah Muswang. Ha kane ka jingïakynduh, ki nongmihkhmat ka Airtel ki la pynthikna ïa ka JNC ba yn sa buh ïa u Network Tower ha Sabah Muswang hapoh lai ne saw bnai hadien ba la ïoh ïaka jaka kaba biang.
Hynrei ka seng ka la pynpaw ïa ka jingsngewsih wat la ka la kut noh ka por ba la kular, hynrei kam shym la don kano kano ka kam kaba la leh da ka kompeni. Ka JNC ka la pynpaw shuh shuh ba ka jingpyrshang ban ïakren bad ki heh jong ka Airtel man ka por ka la ai ïa ki jubab kiba kyllaiñ bad ki bym sngewhun, khlem da buh ïa ka por kaba shai ban sdang ïa ka projek.
Namar ka jingbym leh eiei bad ka jingbym don jingkitkhlieh ka company, ka JNC Western Zone ka la khang khyrdep ïa ka ophis jong ka Airtel bad ka seng ka la ban jur ruh ba katei ka jingleh ka long kaba donkam ban pynbor ïa ka company ban ai ïa ka jingkular kaba shai bad ban sdang noh mardor ïaka kam.
Ka JNC ka la maham ruh ba ka lah ban shim ïa ki lad ki lynti kiba kham tyngeh lada ka Airtel kam lah ban jubab kloi bad weng ïa ki jingeh ha ka network kaba ktah ïa ki nongshong shnong, khamtam eh ïa ki jingshakri ba kongsan kum ka jingpynïasoh ïa ka koit ka khiah ha Woodland Hospital.