Ka Jaiñtia National Council (JNC) Central Executive Committee bad ka Jaiñtia Students’ Union (JSU) Central Body kala shong meeting kyrkieh ha ka 15/7/2026 ha kaba iadei bad ka Rally kaba la long ha ka 14/7/2026 hadien kane na ka liang u President ka JNC bah Sambormi Lyngdoh haba ai jingkren sha ki lad pathai khubor ula ong ba “Haba ngi peit iaka jingkren jong u CEM u Ma Thombor Shiwat uba ong ba nangno ioh bor kine ki ar seng ban tur sha District Council, haka jingshisha ngi lah pyndep iaka kamram jong ngi ban pan bor naka ophis u DC hynrei ngim ioh jubab eiei, hynrei kumba ngi tip ba ngi dei ka democratic country ngi don iaka hok ban iakhih hangno hangno. Kaba ar u CEM u ong ba um tip eiei shaphang kane ka rally jong ngi, kane hi ka pyni iaka jingtlot u CEM namar hashwa ba ngi iaid iaka rally ban pyrshah iaka Shree Cement kam dei shuh kaba thymmai, naduh mynshem snem ngi la pynlong iaki jingiakhih ha Shillong, ha DC ophis Khliehriat, katba ngi sngewlyngngoh pat ba u CEM um tip iakane ka issue, ka jingshisha hi ngi lah dep ban pynbna khubor lyngba ki media. Kaba pynlong iangi ban iakhih ka dei halor ka jingud ki nongshong shnong ka Elaka Nongkhlieh halor ka jingshah knieh jubor iaka jaka puta ka jong ki hapoh ka jingialam u Dolloi uba bynda ia kine ki jaka khlem ka jingtip jong ki trai jaka kiba don daki spah spah Hektar.
Wat ka elaka Sutnga ruh kala kam ba maka ruh ka mad ia kane ka juh ka jingshah knieh jong ki jaka jong ka hapoh kato ka 217 naki 652 Hektar jong ka jingthmu ka Shree Cement ban tih mawshun.
Katkum ka jingsngewthuh bad jingtip jong ngi ki ar seng ba iaka kynrum kynram jong ka khyndew ka shyiap ka dei ban peit daka District Council, kaba la pynkupbor daka constitution of India lyngba ka 6th shedule ban peit khnang iaka huri hura ka khyndew ka shyiap, u pud u sam. Hynrei sngewsih ba une u CEM um pat tip iaka nongrim jong ka jingiakhih jong ngi ki ar seng.
Hooid kumba ka statement jong u CEM u ong Ngam tip eiei shaphang kane ka rally, hynrei haka juh hi ka jingkren jong u, u ong pat ba ha shwa ba ki ar seng bad ki Elaka Nongkhlieh u la phah lypa iaki pulit ban pahara. Ula ong ruh ba kim kwah ban iakren hynrei tang ban pynsawa slogan ne ban pynibor iaka ophis ka jong u. Katba ngi, ngi lah pynkhreh wat iaka memorandum ban aiti sha u CEM. Pynban u CEM u ong ba u kwah ban iakren hynrei um kwah pat. Katkum ka khubor kaba ngi ioh na kaba Ong ba u CEM u don ha kamra hynrei ha shwa ba ngin poi u la phet noh ryngkat ki EM, tip na kaei ka daw. Te kane hi ka jingkren jong u CEM ka pyni shai ba u kwah tang ban tep eit miaw ia kaei kaba ka JHADC ka kum shah pyniaid haki bor ba nabar.
Haba phai pat sha ka NOC, u CEM u ong ba ka jHADC ka ai halor ka jingkyrpad naka elaka bad naka shnong, hynrei haba ngi phai dein pat shaka jingkren jong u CEM ha kiwei naki session ha JHADC, u ong ba dei ka jingpynbor jong ki bor ba halor sa ai pat iaka NOC. Kane ka pynkulmar jingmut shisha. Lada phai shaka sanad jong ki Dolloi bala pynmih naka JHADC, lah kdew shai ba ki Dolloi kim dei ban ai NOC ia kano kano ka kompany khlem ka jingmynjur ka elaka bad ka District Council”. La pynkut ka jingkren pynshai na kitei ki ar Seng.