U Bah Phermiki Phawa, Chairman ka Seiñ Raij Shnong Iongkaluh, u la ïathuh ha ki lad pathai khubor mynta ka sngi halor ka jingpynkhreh na ka bynta ka sngi khatduh jong ka jingrakhe Behdeiñkhlam ka Seiñ Raij Tuber kaba man la u snem, ka ban long lashai ka sngi ha ka Shnong Tuberkmaishnong ha East Jaiñtia Hills District.
Ki khynnah, ki samla bad ki riew rangbah jong ka shnong ki la iasnohkti lang ha ka jingpynkhreh mynta ka sngi ban shna ia ka “Rong bad ka Rot”, ia kaba yn rah sha Biar Aitnar ha Tuberkmaishnong ha ka por lehniam bad pyndep ia ka Behdeiñkhlam lashai ka sngi.
U Bah Phermiki Phawa u la ong ba ka jingpynkhreh ïa ka Behdeiñkhlam mynta u snem bad ka jingshna ïa ka “Rong bad ka Rot” ka la long kaba jop namar ka jingïashim bynta lang jong ki paidbah nongshong shnong. Mynta ka sngi la tip kum ka sngi “Musiang”; la ka “Rong bad ka Rot” la dei ban pyndep ha ka por 1:00 PM, bud sa ka “Shad thyndai.”
Ki tiar kiba kongsan eh kiba la pyndonkam ban shna ia ka “Rong bad ka Rot” ki long ka dieng. La pyndonkam da ki dieng, bad ha ka jingburom ia ka mariang ka imlang sahlang la thung 20 tylli ki dieng ban siew kylliang ia ki dieng kiba la pyndonkam. Kiwei pat ki tiar ki kynthup ia ka jain bad ka dur ba la pyndonkam kum ka jingtap ba shabar. Haba ia dei bad ki jinglut jingsep, u bah Phermiki Phawa u la ong ba ka Seiñ Raij Shnong Iongkaluh ka la kit ia kaba bun ka jinglut. U la bynrap ruh ba u MLA ka thaiñ Khliehriat, u bah Kyrmen Shylla, bad u MDC u bah Wailadameshwa Siangshai ki la ïarap pisa, bad katto katne ngut kiwei pat ki MDC ruh ki la kyrshan ïa ka jingpynkhreh ïa kane ka tamasa.
Ka la shim por san sngi ban pyndep ia ka “Rong bad ka Rot.” Kumba 50–60 ngut ki briew ki la iarap ha kaba tei ia ka. Ka “Rong bad ka Rot” kaba khatduh ka long kumba saw phut ka jingjrong.
