Ka Khooid Ya Ka Wah Myntdu (KYM) kan sa pynlong ia ka jingialang paidbah ha ka 18 tarik mynta u bnai na ka bynta ban iasyllok bad ki nongshong shnong halor ka jingeh kaba mih na ki plastic bad ruh kan don ka jinghikai na ka bynta ban pynkylla sboh ia ki ñiut kiba pyut.
Kumta na ka liang ka KYM ka khot sngewbha naduh ki Waheh Shnong, ki nongialam shnong, ki nongialam jong ki Seng Kynthei ha ki shnong ki thaw, ha ki balang, ki seng niam, ki sengbhalang, ia ki longkmie, ki samla shynrang bad kynthei ban iawan sha kane ka jingialang khnang ba kin ioh ia ka jingpynshai halor ka jingdonkam ban wanrah ia ka mariang kaba khuid ba suba, khnang ban pynioh jingmyntoi ia ki nongshong shnong. Kumjuh ruh ban nang ban sumar khuid ia ka wah Myntdu kaba dei ka nongbsa nongbjiah ia ki nongshong shnong kiba don ha talawiar jong ka.
Ia kane ka jingialang yn pynlong ha Dorbal Hall jong ka Shnong Lion Mission Compound Jowai ha ka por 1:00 PM. Na ka liang jong ki nongialam jong ka SURE ba kynthup ia u President jong ka u Dr. HH. Mohrmen un sa ai jingkren ha kane ka sngi bad yn sa don ka jinghikai ban shna sboh na ki ñiut kiba pyut.