Da ki hajar hajar ki paid riew ngeit jong ki khun ka Khasi Jaiñtia Presbyterian Synod Mihngi mynta ka sngi kila tuid ban sakhi ia ka jingiasengbah jong ka Jingiaseng Synod kaba Arphew (XX) jong ka K.J.P Synod Mihngi ha ka Balang Presbyterian Barato District, Barato Mynso Presbytery, kaba la sdang naduh ka 17 tarik bad pynkut mynta ka sngi 20 tarik Lber, 2022 bad ka phang jong ka Synod mynta u snem ka long “To beh brai ïa ka jinglong suk bad ki briew baroh (1 Thes. 5:15).
Mynta ka sngi ïa ka ktien jong u Blei ha ka por 10 baje mynstep la sam da u Rev. S. Lamare uba la pynshong nongrim na ka ktien jong u Blei na ka Gospel U Laukas ka Lyngnong ba 7 dkhot ba 11-17, uba la pynsngew shaphang ki kambah jong u Jisu kiba ula leh naduh ka jingpynim ïa kiba la ïap, ka jingpynkoit ïa kiba pang ba shitom naduh kiba dkoh, kiba matlah bad kiwei de ki kambah.
U Rev. Lamare ula kyntu ïa ki para bangeit ba kin long kiba ngeit skhem ha U Blei da kaba wan shajan jong u da ka jingkmen bad ka jingaiti lut namar u Trai Jisu u long uba kloi ban ai ïa ka jingdonkam ha kiba ngeit jong u.
Katba ha ka por nohphai sngi ïa ka khubor na ka ktien U Blei la sam da u Rev. W. P. Marsing (Pastor Presbyterian Marngar Umden Presbytery Ri-bhoi District), uba la pynshong nongrim na ka kitab Eksodos ka lyngnong ba 4 dkhot kaba 21 kaba u kren shaphang “u diengduh jong U Blei”.
U Rev Marsing ula pynkymmaw shaphang u Diengduh jong u Moses uba la leh shibun ki kam phylla khamtam ha kaba tied ïa u Mawsiang haduh ban da mih ka umpohliew ba shngiam khnang ba ki khun Israel kin ïoh ban dih kyrhai.
Kumta ruh u kyntu ïa ki paid riewngeit wat hapdeng ka jingduhlad, lada ki bangeit ki shaniah ha U Trai Jisu uba long u Diengduh Diengshan ïa u briew ne ka briew, un pynlait ïa baroh ki jingkutlad ha ka jingim.
U khot ïa ki para Khristan naduh ki nongïalam bad ki para bangeit ba kin don ka jingïatylli, ka jingïalong kawei bad ka jingkyrshan lang ban jop ïa ki kam u kynrad naduh ki District, ki Presbytery bad ki Synod, lada khlem ka jingïatrei lang baroh kin sahkut tang ha ki Rai jingïakut bad ym shem la pyntreikam ïa ki.
Ula ai nuksa ba ‘u Diengduh jong U Blei’ un long uba plie kum ka jingplie ïa ka lynti ban ïaid, kum ka jingkyrshan ha ka lynti ïaid, kum u nongpynmih ïa ki um kiba bang ban dih kiba long ka bor u Mynsiem bad u Diengduh jong u Blei uba ïalam sha ka jingjop ïa ka thma kiba long ki bor jong u bymman, haba pynkut ïa ka jingkren ula ong kum ki paid riewngiet dei ban long ki nongjop ban poi sha ka Ri Kanan kaba long ka jingim bymjukut.
La pynshong shit ïa ki paidriew ngeit da ki jingrwai na ki kynhun Choir mynta ka sngi naduh ka jingïaseng 10 baje mynstep da ka Jingïaseng Samla Balang Mootyrchiah, Jingïaseng Samla Balang Shnongpdeng, Jingïaseng Samla Balang Moobakhon, katba por nohphai sngi ki long ka Jingïaseng Samla Balang Moopala, Standing Choir KJP Synod Mohngi, Jingïaseng Samla Balang Demthring bad ka Jingïaseng Samla Balang Barato.
Ïa kane ka Jingïaseng synod la pynlong biang hadien ka jingwan lyngshop jong ka khlam Covid-19 kata ar snem naduh ka snem 2020 bad 2021 ha kaba ka Synod kala hap ban pynsangeh ïa ka, hynrei mynta ka snem la ïoh lad biang ban pynlong ïa ka Jingïaseng Synod kaba long kum ka lad ban ai mynsiem biang ïa ki pait riewngeit ba kin ïoh bynta lang ban sakhi ïa u Trai Jisu lyngba ka ktien jong u Blei ha kane ka Jingïaseng Synod.
