Ka jingïalehkai quarter final jong ka kyrdan 3rd Division bad ka 2nd Division 2026 League Stage, kaba la pynïaid daka East Jaiñtia Hills District Football Association (EJHDFA) kaba la long mynta ka sngi 5 tarik u Nailur, 2026 ha madan Artificial Ground Diengshynrum, Khliehriat.
Haba phai sha ka jingïakhun Quarter Final jong ka kyrdan 3rd Division hapdeng ka Rymbai Pohskur SC pyrshah ia ka Umrasiang Utd SC, ka Rymbai Pohskur ka la lah ban pynliem ia ka Umrasiang Utd da 2-0 kol, ia kine ki ar tylli ki kol na ka bynta ka Rymbai Pohskur, la ioh ban thep da u Rivaldo Lyngdoh ha ka minit kaba 7 bad u Dakner Dkhar ha ka minit kaba 80+3 jong ka jingialehkai.
Katba ha ka jingialehkai 2nd Division pat kaba long hapdeng ka Khliehriat West FC pyrshah ia ka Tuberkmaishnong SCSC (FT), ki la ioh ban thep mar shi kol (1-1), ka kol na ka bynta ka Tuberkmaishnong SCSC la thep da u Lamwam Phawa ha ka minit kaba 24, katba kawei ka kol na ka bynta ka Khliehriat West FC pat la ioh ban thep da u Zanwame Swer ha ka minit kaba 80+3 jong ka jingialehkai, ha kaba ka por ka kut noh da kaba iadraw. Haba ka jingiakhun ka la poi sha ka jingiashut tie breaker bad ha ka jingiashut tie breaker ka Khliehriat West kala jop da 5-4 kol bad ioh rung syndon sha ka Semi Final.