Ka Jaintia National Council (JNC ) ha ka 7 tarik Nailur 2026 ka lah wan iakynduh ia u Joint Secretary ka Chief Minister Secretariat u S Awashthi haba iadei bad ka Fact Finding Committee ba la pynbna da u Myntri Rangbah ka Jylla ha kine ki khyndiat sngi ba la dep.
Haba kren sha ki lad pathai khubor hadien ba lah dep iakynduh ia u Joint Secretary , na ka Liang u President ka Jaintia National Council u Bah Sambormi Lyngdoh u la pynpaw ba ka Fact Finding Committee kam dei ban long tang na ka bynta ka Public Hearing kaba la dep long shen jong ka Shree Cement, hynrei kaei kaba la jia ha ka 30 bad 31 tarik ka pyshongsyier ia ka jaitbynriew na ka jingleh jong ka Sorkar.
Ka dawbah ka dei halor ka jingshah klun jubor ki jaka jong ki nongshong shnong jong ka Elaka Nongkhlieh .
U Lum Syrman ka jaka rep jong ki nongshong shnong ka Elaka bad da ki spah snem ki lah im da ka rep ka riang ha katei ka jaka bad im japoh na katei ka jaka,bad u pynpaw ba kynsan kynsan kane ka project ka wan bad ki don ruh ki trai jaka kiba don jaka ha u Lum Syrman.
Kumta u President ka JNC u la pynpaw ba ka Seng ka Kwah ba ka Fact Finding Committee ka dei ban kynthup lang ia ki jingeh ki nongrep bad ki trai jaka ha ka Fact Finding Committee bad ka Seng ka la ai jingmut ruh ban kynthup lang ia ka MLA KA Sutnga- Saipung Konstiwensi ha katei ka Fact Finding Committee bad kumjuh ki dei ban kynthup lang ia ki Executive Member jong ka Jaintia District Council khamtam ia kiba dei ia ka Elaka Sutnga bad Elaka Nongkhlieh.
Hadien ba u Myntri Rangbah u la pynbna dang shen ia ka Fact Finding Committee u la iathuh ruh ban pynsangeh noh ia ki kam ki jam baroh jong ka Shree Cement , hynrei ka Seng ka lap ba hadien ba lah pynsangeh ia ki kam ki jam ka Shree Cement tang ha shi sngi, ka Seng ka lap ba ha ka Committee jong ka Sorkar Jylla ka la phah da ka jingthoh Sha ka Shree Cement ba kan pyndep noh Consent Fees khnang ba kan iaid beit shakhmat ia kata ka Environmental Clearance bad kumjuh ban ioh ia kata ka CTE Consent to Establishment, bad hadien kane ka Shree Cement ka la pyndep ia ka jingsiew bad ka poi haduh shi klur, phra lakh hynñiewphew San hajar ha ka 1 tarik bad ha ka 2 tarik ka la phah da ka jingthoh sha ka Special Appriasal Committee ba ka lah dep Siew ia ka pisa.
Ka Seng ka dap da ka jingsngewlyngoh ba ka Sorkar Jylla ka lah dep pynsangeh ia ki kam ki jam ka Shree Cement, hynrei ka Shree Cement bad ka tnad treikam ka Sorkar Jylla ki dang iaid shakhmat na ka bynta ki kot ki sla ka Shree Cement .
Ka Seng ka ioh jingtip ba ka jingpynsangeh ka Sorkar ia ka Shree Cement ka dei tang na ka bynta ka jingtrei hynrei ia ki kot ki sla kim don kata ka jingpynsangeh bad kane ka dei kaei kaei ba ka Sorkar lyngba ka Fact Finding Committee ka kwah ban pynthame ia u paidbah.
Ka Seng ka pynpaw ba kane ka dei kaei kaei kaba ka Sorkar ka shet kylla ia u paidbah bad ka jingtheh umpjah ia ka ding kaba dang Klang ha kaba kane ka Shree Cement ka lah wanrah hapoh ka Jylla bad khamtam ha ka District bad lada ki kot ki sla ka Shree Cement ki iaid beit shakhmat kam don jingmut ia kata ka jingong u Myntri Rangbah bad lada ka Sorkar ka pynsangeh ka dei ban pynsangeh lut baroh ia ki kot ki sla ka Shree Cement katba kane ka Committee kam Pat tip ia ka jingshisha bad ka Seng JNC ka kyntu ia ka Sorkar ba ka dei ban pynsangeh ia ki kot ki sla jong kane ka Shree Cement bad u Joint Secretary u la pynpaw ba un sa iakren bad u Myntri Rangbah ia ki mat kiba ka ka Seng JNC ka dawa la ong u President ka JNC u bah Sambormi Lyngdoh.
