Ka ‘Nan Kashari’ kaba don hajan ka ophis Deputy Commissioner ka dei kawei na ki Nan ba paw bha hapoh ka Ri-Lum Jaiñtia, hynrei ïa kane ka Nan la shu ïeh sah kumto khlem da don shuh kiba pynkhuid ïa ka da ki bun bun snem mynta haduh ba la pynlong ïa kane pung ban kylla rong jyrngam da ki tngit bad ki jaboh.
Hynrei wat hapdeng ki jaboh jong katei ka Nan kaba dap lut da ki ñiut ki nier khamtam ki plastic ba bun jait, hynrei ki dohkha ki im sohsat hapoh katei ka nan kiba jngi sharum shaneng bad khynrup ïa kitei ki plastic kiba bit jingbam.
Ha syndah jong kane ka Nan la don ka Park hapoh ka jingpeit jong ka Forest & Environment Department kaba itynnad bad ka Tpep Thang Sati ka kur Dkhar, ïa kaba la plie paidbah ha sngi pynneh pynsah mariang kata ha u snem 2010 da u bah T. Dkhar IAS uba dei u Deputy Commissioner ka West Jaiñtia Hills ha kato ka por.
Ban pynlong ïa kane ka Nan kaba khuid bad kaba itynnat bad ka ban khring ïa ki nongwan jngohkai napoh ka sor Jowai bad nabar la sngew dei ban kyntu ïa kito kiba longtrai ban peit ïa kane ka Nan ba kin shim khia ban sumar da kaba pynkhuid bad pynitynnat shuh shuh ïa kane ka Nan, katno kan long kaba itynnat ban peitkai bad ïoh jingïaroh ruh da ki briew kiba ïaid lynti najan jong katei ka Nan.
Kane ka jingïohlad ki briew ban bret ïa ki jakhlia jakhlait ha kane ka Nan, i kumba ym don ba kam bad longtrai ban sumar bad pynkhuid ïa ka. Ka jingdon jong kane ka Nan hapdeng jong ka sor kala pynlong ïa Nongbah Jowai kaba itynnad lada ka long kaba khuid ba suba.
