Ka KSU Laskein Circle myn ha ka 7 tarik mynta u bnai, 2026, ka la ioh ban pynkha shnat treikam ba thymmai kaba la tip kum ka KSU Mynkrem Unit ha kaba la wan ban pyntiansmai ia ki nongkitkam jong kane ka Unit da u samla Shiningstar Kharbihkhiew, Environment Secretary, KSU CEC.
Ia kane ka jingialang la pyniaid da u General Secretary KSU West Jaintia Hills District Unit samla Leningrad Tariang. La ioh ka jingkren na u samla Shiningstar Kharbihkhiew, u samla Pynshai Kupar Dkhar uba bat kum u Information & Publicity Secretary KSU CEC, samla Laitphar Syngkrem President KSU West Jaintia Hills District, samla Shaniahskhem Dkhar Finance Secretary KSU East Jaintia Hills District, samla Nipoi Shadap uba dei u General Secretary ka KSU Jowai circle na u waheh shnong ka shnong Mynkrem bad kiwei de.
Ha ka jingkren u samla Shiningstar Kharbihkhiew u la ai ka jingsneng jingkyntu ia ki dkhot ba kin iatreilang ryngkat bad ki nongialam shnong na ka bynta ka bha ka miat ka shnong ka thaw, u la pynsngewthuh ruh ba kum ka seng kin nym pyrshah ia kano kano ka sorkar kaba wanrah ia ka jingmyntoi lyngba ka jingiatreilang bad ka shnong ka thaw na ka bynta ka jingbit jingbiang bad jingmyntoi ka shnong ka thaw hi hynrei kaei kaba ki pyrshah ha kine ki bnai baladep dei namarba ka sorkar ka iuhroit bad khniot jubor ia ka hok u paitbah bad dei na kane ka daw ba ka KSU ka mih shakhmat ban pyrshah ia ka sorkar ka pynthud ia ka jingmyntoi u paitbah bad ia ka jingshongsuk shongshngaiñ u paitbah. U la sneng la kyntu ruh ia ki khun samla kynthei bad shynrang ban kiar na ka shongkha khynnah hynrei ban shim ia ka sienjam longkmie longkpa ynda haba la biang ka kam ka jam bad ka trei ka ktah namar ka jingshongkha khynnah ka dei kawei kaba pynhiar arsut ia ka ri bad ka jaitbynriew jongngi.
U samla Pynshai Kupar Dkhar haba ai jingkren u la ong ba ha ka pyrthei hi ki don lai kynhun ki jait briew, ka kynhun briew kaba nyngkong ka dei ki jait briew kaba majority na ki, ki bym da bun pait hynrei kiba peit ia kaei kaei kaba jia ha ka imlang sahlang, ka kynhun kaba ar ka dei ka kynhun ki jaitbriew kiba pynlong bad pynjia ia kaei kaei kaba jia ne long ha ka imlang sahlang bad ka kynhun kaba lai ka dei kaba bun pait tam bad kane ka kynhun ka dei ka bym tip ia kaei ka ban jia ha ka imlang ka sahlang bad u la kyntu ba kum ka Unit ba thymmai jong ka seng ki dei ban don ha ka kynhun kaba iohi ia kiei kiei ba jia bad kiba leh ruh ban pynbha.
La pynshongkun ia ka jingialang da ka jingwan shimbynta kynthup naduh ki longkmie longkpa, ki khun samla, ki hep barit bad na ka jingshad tynrai bad shad pliang da ki longkmie bad khun samla ka shnong Mynkrem.