Ka West Jaintia District Sports Association (WJDSA), ka la pynlong ïa ka jingïalang na ka bynta ban phah ïa ka kynhun ki nongïalehkai Athletics jong ka, ki ban mihkhmat ïa ka West Jaintia Hills District (WJDSA), ha ka Meghalaya State Senior Athletics Championship 2026, kaba la buh ban long naduh 14 haduh 16 tarik u Nailur 2026, ha SAI, STC, Shillong. Kane ka jingïalang ka la long ha janmiet jong ka 11 tarik u Nailur ha Indoor Sports Hall jong ka WJDSA, Jowai.
Ïa ka jingïalang la pynïaid da u Cheini W. Niangti, Chairman ka Athletic Committee, WJDSA. Ha kane ka jingïalang la wan shim bynta da ki nongkitkam, ka WJDSA, Coach bad ki dkhot jong ka kynhun Athletics. U Lammat-o Laloo, Adviser WJDSA, uba la ai ruh ki jingkren ba kyrpang, ha kaba u la ai mynsiem bad kyntu ïa ki nongïalehkai ka kynhun ban ai ne pyni ia ka jinglah kaba bha tam ha ka lympung jong kane ka State Championship.
Kiwei pat kiba donlang ki kynthup ïa u Ryum Khonglah Honorary General Secretary, WJDSA, u Ram Phawa Vice President, WJDSA, u Ebortre Dkhar, Coach, u Cheini W. Niangti, Chairman Athletic Committee, WJDSA bad kiwei de ha ka jingiadonlang ka kynhun.
Ka kynhun jong ka WJDSA ka don 26 ngut ki nongïalehkai, kiba kynthup ïa 16 ngut ki shynrang bad 10 ngut ki kynthei. Ki nongïalehkai ki dei kiba la khreh ban mih ïakhun ha ka State Championship ryngkat bad ki nongïalehkai na kylleng ka jylla Meghalaya.
Haba kren ha ka jingïalang, u Lammat-o Laloo u la kyntu ïa ki nongïalehkai ban long kiba peitngor, kiba don discipline bad ban ai ïa ka jinglah kaba bha tam ha kaba mihkhmat ïa ka West Jaintia Hills ha ka kyrdan State.
Ka Association ka la ai khublei ïa ki coach, ki trainer, ki kmie ki kpa bad ki nongïalehkai halor ka jingtrei shitom bad ka jingïarap kaba ki la ai ha ka jingpynkhreh ïa ka kynhun na ka bynta kane ka lympung.
Ka WJDSA ka kitbok kitrwiang ïa baroh 26 ngut ki nongïalehkai bad kyrmen ba ka jingïashim bynta bad ka jingjop jong ki kan ai mynsiem ïa kiba bun ki samla na West Jaintia Hills ban shim ïa ka Athletics bad ban pynjanai ïa ka sap ha ki jingïalehkai. Kane ka long katkum ka khubor na u Marso Kyndait Athletic Secretary, WJDSA.