Mynta ka sngi u Dolloi jong ka Elaka Jowai u ma Puramon Kynjing ula ioh ban pynskhem ia kawei na ki shnong kiba la seng thymmai hapoh Jowai ia kaba la ai kyrteng ka Shnong Myntdu.
Halor ka jingpynskhem ia kane ka shnong thymmai na ka liang jong u Dolloi Jowai ula khot pynlong da ka jingialang bishar paitbah, kaba la pynlong ha phyllaw ïing jong ka kong Simple June Pakyntein, kaba don ha jingkieng Myntdu, jong ka Elaka Jowai.
Hashwa ban pynskem ia kane ka shnong kala don ka jingiamir jingmut bad jingpynshai paidbah ha kaba la shim ruh ia ka jingmynjur jong u paidbah na ka bynta ban thaw noh ia kane ka shnong ba thymmai.
Kane ka shnong thymmai ka kynthup ia ki nongshnong shnong kiba don ha Liar Kam Kam, Jingkieng Myntdu bad kiwei ki nongshong shnong ba marjan.
Kane ka shnong thymmai kaba la tip kyrteng ka Dorbar Shnong Myntdu ka don 35 thyndai ïing, bad ki pud sawdong jong ka ki kynthup na Misngi – Dorbar Shnong Caroline, Sepngi – Wah Mynkrem, Shatei – Liar Kam Kam bad Shathie – Dorbar Shnong Iawmusiang.
