U Myntri ka tnat ialehkai sports u bah Banteidor Lyngdoh, mynta ka sngi (26.03.2022), u la wan plie ia ka jingsdang ka jingrakhe ia ka Jubilee Ksiar ne ka jingdap 50 snem pura ka West Jaintia District Sports Association (WJDSA) ia kaba la ju tip mynshwa kum ka Jaintia District Sports Association (JDSA), mynta ka sngi ladon lang ruh u ma Kyrmen Shylla u myntri ka sorkar jylla ryngkat ka jingdonlang ki dkhot ka WJDSA kiba mynta bad kiba la shong thait ruh, ki MDC ki ophisar sorkar bad kiwei de kiba la shah khot sngewbha sha kane ka sngi sah jingkynmaw jong kane ka Association.
U bah Bantei dor haba kren u la ai ka jingiaroh ia ki nongkit kam kane ka seng naduh ki por mynshwa haduh ba ka la ioh ban sakhi ne rakhe pyndonburom ia kane ka sngi, u la ong ba u iohi ba bun ki Association kiba mih hynrei kim long kiba iaineh kiba shu jah noh tang katto katne por, u la ong kane ka Association ka don shisha ka jingiatreilang naduh ki nongkit kam kiba la mynshwa haduh kiba mynta. U la ong ba lyngba ka jingtrei shitom jong kane ka association la lah ban pynmih shi bun ngut ki khur ialehkai kiba la iashim bynta ha ki jingialehkai bapher bapher khamtam ha ka phutbol.
Na ka liang jong u bah Bantei u la ong ba un ai jingiarap T. 5 lak tyngka sha kane ka Association, ha ka jingiadei bad kane ka jingrakhe. U la ong ba ha ka jingdei bad ki kam ialehkai ka sorkar ka buh thong ban pynlut da ki spah klur ha ka ban pynshna ia ki jaka ialehkai bapher bapher hapoh ka jylla.
Na ka liang u ma Kyrmen Shylla haba kren u la kitbok kitrwiang ia kane ka Association ba kan nangiaid shakhmat ha ka ban kyntiew ia ki kam ialehkai bapher bapher, u la ong ba ka jingdon ki jaka lehkai ne ki ne nonghikai ban pyntbit ia ki samla ba dangkhie kan pynlait ia ki na kino kino ki kam sniew, na ka liang jong u ruh u la ong ba un ai ka jingiarap sha kane ka Asoosiation katba u lah ka bor.
Mynta ka sngi ia ka khana lyngkot jong ka jingiaid lynti jong kane ka Association la ai da u ma Lammat-oo Laloo General Secretary WJDSA, ka jingkren na u ma S. K. Lato Founder Member, ma E.M.H. Passah Working President, ma Patrict Lamare Vice President WJDSA, ma Kennedy Shylla Joint Secretary WJDSA.
La pynphuh pynphieng shuh shuh ia kane ka sngi da ka jingshad pliang, rwai tynrai bad kiwei de ki prokram.
